Até 200 persoas participaron no webinar sobre as axudas á innovación de GAIN, Xesgalicia e o CDTI
venres, 5 de xuño do 2020
- Patricia Argerey, directora da Axencia Galega de Innovación
A
Axencia
Galega de Innovación (GAIN), Xesgalicia e o Centro para o
Desenvolvemento Tecnolóxico Industrial (CDTI) celebraron este 5 de
xuño un seminario online para presentar as principais
axudas e novidades nos instrumentos de apoio destas entidades. A
xornada, na que participou a directora de GAIN, Patricia Argerey,
presentáronse as principais axudas que teñen vixentes actualmente a
axencia autonómica e Xesgalicia, as novidades nas liñas de
financiamento de CDTI, así como a presentación do programa NEOTEC
de CDTI, que busca apoiar a creación e consolidación de novas
empresas de base tecnolóxica en España (e ten aberto o prazo até o
30 de xuño).
No
webinar, Argerey salientou que “a importancia da ciencia e da
innovación se ten posto de relevo se cabe aínda máis neste novo
contexto socioeconómico”, polo que animou aos máis de 200
asistentes á xornada a “aproveitar todos os programas de apoio que
están actualmente abertos por parte de diferentes institucións para
financiar os seus proxectos de futuro en materia de I+D+i”.
Pola
súa banda, o director de XesGalicia, Fernando Guldrís, recalcou que
en Galicia “existen interesantes posibilidades de apoio público á
innovación”.
Axudas
diversas
No
marco desta xornada online presentáronse as axudas de apoio á
innovación que ten actualmente abertas a Axencia Galega de
Innovación, así como os fondos de investimento de XesGalicia
orientados a empresas innovadoras. Representantes do o Centro para o
Desenvolvemento Tecnolóxico Industrial expuxeron tamén as novidades
nas súas liñas de financiamento á innovación.
Segundo
lembraron os participantes no webinar, a Xunta tamén mantén
abertas varias liñas de apoio á innovación destinadas a potenciar
o tecido empresarial. Entre elas, destaca o programa Principia,
destinado a fomentar a contratación de técnicos de ata 35 anos para
a realización de actividades de I+D+i en empresas e organismos de
investigación e que pecha o prazo de solicitude o vindeiro luns.
Amais,
na cita púxose o foco nas posibilidades que abre o programa
InnovaPeme, orientado á mellora da capacidade innovadora de pemes e
microempresas a través do apoio á implementación dun plan de
innovación, cuxo prazo de solicitude pecha o 18 de xuño.
Tamén
se informou da liña que está actualmente aberta para fomentar a
participación galega no programa europeo de I+D+i, H2020, e o
programa ReAcciona do IGAPE que este ano incorpora como novidade, coa
colaboración de GAIN, tres novos servizos de apoio á innovación.
Ademais,
a Administración galega, a través de XesGalicia, dispón de dous
fondos de investimento orientados a apoiar a actividade de empresas
innovadoras, Innova Tech e Galicia Iniciativas Emprendedoras. Por un
lado, Innova Tech apoia proxectos con marcado carácter innovador de
empresas tecnolóxicas, en fase de expansión e consolidación;
mentres que Galicia Iniciativas Emprendedoras impulsa a posta en
marcha de novos proxectos por parte de empresas novas ou de recente
creación.
A
xornada enmarcouse no marco de colaboración entre a Axencia Galega
de Innovación, dependente da Consellería de Economía, Emprego e
Industria, e o CDTI que inclúe, entre outras actuacións, a
promoción conxunta da I+D+i en Galicia e dos instrumentos de
financiamento e programas de axudas estatais e internacionais en
Galicia.