Até 320 empresas beneficiáronse dos programas tecnolóxicos da Cámara da Coruña

A Cámara da Coruña presentou o seu balance de actividade 2022, que pechou cunha “situación de equilibrio orzamentario”, sen ningún tipo de débeda financeira nin comercial. No informe faise saber que foron 4.500 as empresas e persoas emprendedoras beneficiarias dos programas que xestiona a entidade.
O pasado exercicio a entidade trasladou ás empresas un total de 3.3M€. Así, 1.2M€ destináronse aos programas de impulso á internacionalización de exportadores.
Para os programas de fomento do emprego dirixidos a mozos e a persoas maiores de 45 anos en situación de desemprego, a entidade xestionou 1.5M€ e para os programas de apoio a empresas para innovación e novas tecnoloxías, manexou un orzamento de 622.000€. Nestes programas de fomento da innovación e a transformación dixital participaron 320 empresas. 40 das cales participaron nos programas Innocámaras e TICCámaras, que se desenvolven en dúas fases, unha primeira de diagnóstico de situación e informe de recomendacións e unha segunda de axudas directas ao investimento. Co programa Industria 4.0 e Ciberseguridade, 16 empresas puideron optimizar o aproveitamento das tecnoloxías nos seus negocios.
Así mesmo, a Cámara puxo en marcha plans específicos para fomentar a competitividade do pequeno comercio e o sector turístico, dos que se beneficiaron preto de 40 negocios.
Cun orzamento próximo aos 72.000€, a Oficina Acelera PEME da Cámara atendeu a 225 empresas, organizou 22 xornadas informativas ás que asistiron unhas 615 persoas. A través deste servizo, a entidade atende, de forma gratuíta e personalizada, a pequenas e medianas empresas, micropemes, autónomos e emprendedores da área interesados no programa Kit Dixital, en comezar ou en avanzar nos seus procesos de dixitalización, pero tamén axuda a pequenas e medianas empresas provedoras de tecnoloxía a introducir os seus produtos e solucións no mercado.