Audiovisuais da Deputación de Lugo emitirá en streaming o oitavo Lucus Intercentros

mércores, 16 de xaneiro do 2019 Fernando Sarasketa

O Servizo de Audiovisuais da Deputación de Lugo, departamento que dá continuidade e amplifica o importante labor de divulgación e formación (audiovisual, dixital) da Fundación TIC, vai emitir en streaming a oitava edición do Concurso Lucus Intercentros. A cita será este 18 de xaneiro, dende o IES Muralla Romana de Lugo. Neste certame de preguntas e respostas sobre contidos propios do seu nivel formativo participan estudantes de primeiro de Bacharelato de sete institutos da capital.
A iniciativa parte do alumnado de Administración e Xestión do Muralla Romana, coa colaboración do seu departamento de informática, do CIFP Politécnico, da Escola de Arte e Superior de Deseño Ramón Falcón e do Centro de Formación Audiovisual de Lugo.
No certame participará un equipo de dez estudantes, supervisados por un docente, e técnicos do Servizo de Audiovisuais, que empregarán catro cámaras e todo o material preciso para a transmisión a través da Rede do acontecemento. Segundo informa a Deputación de Lugo, o alumnado rotará polos postos de realizador, mesturador de vídeo, son, e operador de cámara, co fin de aproveitar ao máximo á práctica formativa.
Contribución educativa
A emisión do Lucus Intercentros comezará ás 12:00 horas, e está previsto que remate ás 14:00 horas coa entrega de premios aos equipos gañadores. As persoas interesadas en seguir a competición en tempo real poden facelo a través da canle de YouTube do Servizo de Audiovisuais da Deputación e do seu Facebook, e na web do IES Muralla Romana www.edu.xunta.es/centros/iesmurallaromana. A Deputación tamén explica que con posterioridade a este evento, as imaxes gravadas serán a materia prima dun DVD que se entregará aos centros educativos para divulgar esta actividade. Esta é posíbel grazas ao convenio de colaboración entre o Centro de Formación de Audiovisuais da Deputación e o IES Muralla Romana. O obxectivo é que os estudantes do CFA completen a súa formación de cara a súa inserción laboral.

PUBLICIDADE