Autonet leva a Internet por Wi-Fi aos automóbiles norteamericanos

En Galicia coñecemos sobradamente a posibilidade da utilización de redes Wi-Fi para acceder á Internet grazas ao router ReVisio de Level Telecom e Arteixo Telecom, pero en Norteamérica a empresa Autonet Mobile decidiu explotar directamente unha solución semellante, consistente tamén nun router que comparte por Wi-Fi unha conexión de banda larga móbil, e que se utiliza en combinación con bonos mensuais de 1 Gb e 5 Gb de transferencia de datos por redes móbiles por 29 e 59 dólares ao mes respectivamente.
O servizo conta cunha cobertura bastante ampla, comercializándose tanto nos EE.UU. como en Canadá, e permite que durante longas viaxes os pasaxeiros do automóbil poidan acceder á rede dende os seus dispositivos Wi-Fi (portátiles, móbiles intelixentes, consolas de videoxogos portátiles…).
Walter S. Mossberg analizou esta solución comercial de conectividade, deixando notar as limitacións destas conexións (que serían case as mesmas que as de calquera outra solución de Internet móbil) pero destacando que podería ser unha distracción para os condutores (lembremos que só deberían facer uso do mesmo os acompañantes), aínda que a súa principal pega sería o algo prezo do router (que nun principio se vende a 499 dólares).
Pero, ¿por qué acceder á banda larga móbil por Wi-Fi? A resposta é sinxela: permite o uso dunha mesma conexión por parte de varios usuarios e dispositivos á vez. Iso non só é máis cómodo, senón que supón un aforro económico. Amais, o router está optimizado para evitar perder a conectividade á Rede en marcha o que tamén resulta bastante cómodo, aínda que hai que recoñecer que o seu uso non tería por qué limitarse aos desprazamentos, pois nalgúns casos tamén serviría para conectarse á Rede na proximidade ao vehículo, o que resultaría práctico para os usuarios que se desprazasen do seu fogar durante as fins de semanas ou vacacións.