Avaaz supera a barreira dos 15 millóns de internautas-activistas

A comunidade Avaaz, unha asociación de activistas de todo o mundo que tira proveito da Rede para ser máis, chegar máis lonxe e apuntar mellor, está este luns 23 de xullo de celebración. O motivo: ter superado a liña dos 15 millóns de membros, o que a sitúa, por dereito propio, como o movemento político en liña máis grande da historia. A cifra, sinalan dende Avaaz, desminte (por unha vez) a crenza de que o tamaño non importa, xa que, polo menos neste caso concreto, si que o fai. De outro xeito, non se poderían ter acadado cousas como as que se acadaron: deter a aprobación do ACTA (o tratado global para permitir que as grandes corporacións censuren a Internet) ou a protección da selva brasileira (que estivo a piques de caer nas mans das madeireiras).
“Nos últimos seis meses”, sinalan os responsables desta plataforma, “loitamos e axudamos a gañar batallas clave para salvar Internet ou crear a meirande reserva mariña do mundo, ou tamén para manter a presión sobre a mafia mediática de Rupert Murdoch, ao tempo que se facía o posible por impulsar a transición democrática de Siria, entre outros moitos exemplos”.
Todo isto é o resultado da aplicación do potencial convocador das redes sociais ao servizo das causas solidarias mundiais. Peticións en liña, chamadas, mensaxes ou doazóns foron algunhas das ferramentas empregadas, “en combinación co esforzo de aliados estratéxicos e líderes, e do devandito emprego de potentes canles de transmisión cara aos medios e cara a quen toma as decisións”. Entre os logros recentes de Avaaz, cómpre salientar a paralización do devandito ACTA, o tratado global contra o que xuntaron forzas ata 2,8 millóns de activistas da dita comunidade internacional.