Ayaneo copia a Steam Deck até no software

O fabricante de consolas Anayeo anunciou no CES de Las Vegas que ía lanzar unha consolas portátil moi semellante á Steam Deck, non só no hardware, senón tamén no software, xa que funcionaría con HoloISO, unha variante non oficial de SteamOS, de xeito que pretende conseguir boas vendas ao venderse como unha versión económica da consola de Valve.
Unha vez reveladas as especificacións, os modelos e os prezos, si temos un interesante produto, aínda que a diferenza de prezo é demasiado cativa (uns 50 dólares) para competir cun produto con tanto nome como a Steam Deck.
Entrando en fariña, a Ayaneo Next Lite chegará con pantalla IPS de 7 polgadas cunha resolución de 800p, con procesador AMD Ryzen 5 4500U ou 7 4800U, 16 GB de RAM, 128/512 GB de SSD, batería de 47 Wh e un prezo que vai dende os 299 aos 399 dólares, de xeito que, aínda que a versión máis potente ten problemas para competir coa consola de Valve, o modelo máis básico si resulta competitivo, xa que por 299 dólares ten un almacenamento SSD de 128 GB, mentres que a versión básica da Steam Deck ten almacenamento eMMC de 64 GB (ou sexa, máis lento e reducido). Haberá que ver se a distribución europea non incrementa o prezo dun produto que pode atopar o seu público entre usuarios que queiran gozar deste concepto de consola portátil sen realizar un grande investimento.
Un detalle que si cómpre ter moi en conta coa Ayaneo Next Lite é que o seu almacenamento interno pode actualizarse, soportando memorias NVMe de até 8 TB, polo que estamos ante un dispositivo que a longo prazo pode resultar moi interesante, xa que cada días teñen un prezo máis reducido este tipo de unidades de almacenamento.