Ayaneo rende homenaxe á Game Boy Micro cunha nova consola portátil

O fabricante chinés Ayaneo ten comercializado nos últimos anos numerosas consolas portátiles que van dende ordenadores consolizados até dispositivos claramente inspirados en consolas clásicas como a Game Boy, e agora sorprenden coa Ayaneo Pocket Micro, unha nova consola portátil que resulta rechamante por recuperar o concepto da Game Boy Micro.
Esta nova consola pode adquirirse a través de Indiegogo a un prezo que parte dos 176 euros, o que pode parecer bastante elevado se temos en conta que existen numerosos consolas portátiles de fabricación chinesa por prezos moitos máis axustados e con posibilidades moi semellantes, pero neste caso falamos dun produto que presume de ser Premium (como denota o seu marco de aluminio).
A Ayaneo Pocket Micro conta cunha pantalla IPS de 3,5 polgadas cunha resolución de 960 x 640 píxeles e un brillo de 400 nits, que funciona cun procesador MediaTek Helios G99 con 6/8 GB de RAM LPDDR4X e 128/256 GB de almacenamento UFS 2.2 e, aparte de poder controlarse mediante unha clásica cruceta e 4 botóns de disparo tradicionais, inclúe tamén un par de pancas analóxicas para así poder gozar tamén de xogos con mecánicas modernas. Tampouco esquece un par de botóns de gatillo a cada lado da consola.
Este trebello funciona con Android 13, ten conectividade Wi-Fi 5 e Bluetooth 5.2, e pode gozar de grande portabilidade dado o seu peso de só 233 gramos e a súa batería de 2.600 mAh (que achega até 6 horas de autonomía).
Aínda que o formato desta consola parece enfocado a gozar de xogos de Game Boy Advance mediante emuladores (de feito, a súa resolución de pantalla é 4 veces superior á desta consola clásica, facilitando así o reescalado de imaxe), permite gozar incluso de xogos para PlayStation 2. A súa interface de usuario está adaptada para facilitar a carga e configuración de videoxogos, dando a impresión de que os títulos cargados no seu almacenamento interno están instalados de xeito nativo nunha consola.