Baby Shark destrona a Despacito en YouTube

En agosto de 2017 o tema Despacito de Luis Fonsi con Daddy Yankee convertíase na canción máis reproducida da historia en YouTube, con 2.999 millóns de reproducións, pulo que mantivo durante bastante tempo de xeito que actualmente suma 7.039 millóns de reproducións.
O éxito de Despacito sorprendeu especialmente polo feito de que a canción precisou de pouco máis de medio ano para converterse no meirande éxito da historia de YouTube, tardando só 154 días en superar os 2.000 millóns de reproducións, deixando claro que o ritmo dos éxitos na plataforma global de vídeo acelerárase moitísimo, pero nesta ocasión temos xusto o contrario, xa que un vídeo musical de xuño de 2016 conseguiu que a forza da longa cola o levase a superar a Despacito con 7.048 millóns de reproducións, e non eu outro tema que o xa clásico infantil Baby Shark Dance.
Baby Shark converteuse no tempo en todo un fenómeno, dando lugar a numerosas versións e incluso conseguindo coarse en xogos de baile como Just Dance 2020, e dado que o público ao que vai dirixido é moi proclive ás repeticións, a canción conseguiu acumular un volume de reproducións sen precedentes, de xeito que a canle de YouTube de Pinkfong é un éxito en si mesmo, aínda que a compañía soubo capitalizar a boa acollida de Baby Shark de aí que sexa posible atopar dende cereais da marca Kellogg’s até material escolar.
A nivel galego, Esther Estévez do #DígochoEu aproveitou a música de Baby Shark para lembrar en TikTok que a palabra tiburón está aceptada en galego (así como quenlla, pero non tabeirón), deixando claro o impacto viral desta canción na Rede.