Baiona habilitará dúas ducias de balizas electrónicas para achegar información turística aos móbiles
venres, 19 de agosto do 2022
O
Concello de Baiona vai dar un impulso transformador e dixitalizador
aos seus servizos turísticos. Segundo informaron a Deputación de
Pontevedra e o Gobenro local, Baiona tirará proveito das
posibilidades interactivas que achegan os dispositivos móbiles para
enriquecer as experiencias de todas as persoas que acudan á vila, e
máis polo miúdo á súa Oficina de Turismo. Empregaranse neste
punto recursos como novos soportes de datos (beacons), unha
impresora braille ou un bucle magnético. O proxecto
chámase Tourist Inside e conta con financiamento europeo
xestionado polo Goberno.
As
melloras foron anunciadas pola presidenta provincial, Carmela Silva,
quen tamén comunicou investimentos nos vindeiros meses de cara á
dixitalización desta oficina da man do proxecto europeo Tourist
Inside Rías Baixas. Fíxoo nunha visita a este espazo de información
na que tamén estivo presente o alcalde de Baiona, Carlos Gómez.
Segundo
explicaron, Tourist Inside fará “que as Tecnoloxías da
Información e a Comunicación sirvan para optimizar a satisfacción
das e dos visitantes da oficina de Baiona así como a experiencia
turística das persoas con diversidade funcional, dado que ao abeiro
deste proxecto instalarase unha impresora braille na oficina, que
permitirá ampliar a oferta de información escrita, así como un
bucle magnético, que axudará a que as persoas con dificultades de
audición desfruten por completo das visitas guiadas neste concello”.
A
oficina de Baiona tamén contará cunha pantalla de 55 polgadas no
seu interior na que se divulgarán contidos de interese turístico de
Pontevedra provincia así como cun tótem situado na fachada exterior
do inmóbel no que se proporcionará información do destino. Do
mesmo xeito, habilitarase unha tableta que se empregará para
realizar enquisas de satisfacción.
Ademais,
en 24 puntos do concello disporanse beacons, ou sexa, balizas
electrónicas que transmitirán información de interese aos móbiles
das e dos visitantes a través da tecnoloxía Bluetooth.
Na
presentación tamén se fixo saber que o punto de información
dispón do distintivo de calidade que outorga o Instituto para a
Calidade Turística Española (ICTE) o que “converte a oficina
nunha referencia na atención aos visitantes, dado o grao de
cumprimento dos estándares e procedementos certificados”.