Band Hero chegará á Nintendo DS con novos accesorios

venres, 24 de xullo do 2009 Marcus Fernández

O Drum Grip permite usar os botóns da DS coma se fosen unha batería

Seguindo coa franquía de Guitar Hero para a Nintendo DS, Activision anuncia que Band Hero (a versión popeira do xogo guitarreiro que sairá en novembro) terá a súa propia versión para a portátil de Nintendo, que para conseguir unha experiencia de xogo axeitada contará con novos accesorios de xeito que será posible facer uso de guitarra e baixo (cun accesorio coma o que xa incluía o Guitar Hero On Tour), a voz e mesmo a batería (cun recubrimento de goma que pode colocarse sobre os botóns da Nintendo DS dándolles a forma dunha batería normal, aínda que continuará sendo posible xogar valéndose da pantalla táctil da consola).
O Band Hero DS incluirá 30 temas de grupos actuais coma Blink-182, Avril Lavigne, The Killers, KT Tunstall e Fall Out Boy, e coma novidade tamén ofrecerá un editor de rockeiros que permitirá personalizar os personaxes do xogo.
Segundo parece, o Guitar Grip continúa a funcionar conectado ao porto de Game Boy Advance da Nintendo DS, polo que sería incompatible coa nova Nintendo DSi.

A diferenza entre o Guitar Grip de Guitar Hero On Tour e Band Hero será só estética

PUBLICIDADE