Barcelona terá unha ocupación do 90% durante a Mobile World Congress

xoves, 18 de febreiro do 2016 Redacción

Trivago, o comparador en liña de establecementos turísticos, vén de facer reconto dos prezos e dispoñibilidade hostaleira de Barcelona con motivo do inminente Mobile World Congress, a feira sobre novas tecnoloxías e mobilidade que se desenvolve entre o 22 e o 25 de febreiro e que promete ser un dos grandes eventos TIC desta primeira metade do ano en Europa. O informe de Trivago (descargábel en PDF), sinala que a capital catalá estará ao 90% de ocupación hostaleira durante a celebración do dito evento tecnolóxico. O motivo non é para menos, posto que a previsión é a de dar acubillo, nos devanditos días, a máis de 100.000 visitantes, entre profesionais (desenvolvedores, fabricantes, representantes) e seareiros das TIC procedentes de todo o mundo.
Segundo se di no informe, o prezo medio por noite é de 237 euros ao longo de todo o evento, o que “supón un incremente de case o dobre se o comparamos co prezo medio de 122 euros que achegan os hoteis da cidade para o mes de febreiro”. En relación co ano pasado, o prezo medio durante o Mobile World Congress diminuíu un 14%, pasando dos 278 aos 237 euros.
Como dixemos, a ocupación hostaleira tamén amosa cifras elevadas, posto que arestora a dispoñibilidade é do 10% en Internet, sendo do 16% nas mesmas datas de 2015. Segundo apunta Trivago, malia estas cifras de ocupación (máis altas que en 2015 e en 2014) este ano rexístrase o prezo máis económico das últimas edicións. O comparador tamén lembra no seu informe que MWC é a cita “obrigada do sector TIC e xunta profesionais da industria móbil procedentes de todo o mundo”. Durante esta edición, engádese, Barcelona encherase de visitantes de Italia, Reino Unido, Alemaña, Francia, EE UU e China.

PUBLICIDADE