Bayonetta 3 será un xogo exclusivo de Nintendo Switch

Nos últimos días celebrouse a entrega dos The Game Awards, galardóns do mundo do videoxogo que salientaron como título do ano a The Legend of Zelda: Breath of the Wild e como mellor xogo para consola portátil ao español Metroid: Samus Returns, aproveitando Nintendo a ocasión para realizar un grande anuncio: PlatinumGames está a traballar en Bayonetta 3, xogo que será exclusivo para Nintendo Switch.
Nintendo xa fixera algo semellante con Bayonetta 2, xogo que era exclusivo de Wii U, o que fixo que moita xente non puidera gozar deste título, o que parece que queren arranxar agora, de xeito que o 16 de febreiro porase á venda en Europa Bayonetta 2 para Nintendo Switch, incluíndo un código de descarga do Bayonetta orixinal, facilitando así a revisión destes dous grandes hack and slash e preparando o terreo para a súa terceira entrega.
Bayonetta 2 venderase nunha edición sinxela, pero tamén estará dispoñible nunha edición especial que incluirá unha caixa metálica, 22 cartas de versículo e 3 láminas de adhesivos.