Bing ofrece a creación de vídeo de OpenAI de balde

Microsoft deu un novo paso na súa estratexia de intelixencia artificial coa estrea de Bing Video Creator, unha ferramenta de balde que permite xerar vídeos curtos a partir de descricións textuais. A funcionalidade, xa dispoñible na aplicación móbil de Bing e en breve tamén para escritorio, está impulsada polo modelo Sora de OpenAI e permite transformar calquera idea escrita nun vídeo de cinco segundos de duración.
O servizo forma parte da evolución do buscador Bing cara a unha experiencia máis interactiva e creativa, tras a integración recente de Copilot Search. Os vídeos poden xerarse en formato 9:16, con opción para 16:9 prevista nunha futura actualización. A ferramenta permite ter ata tres vídeos en cola e ofrece a posibilidade de escoller entre modos de xeración rápida ou estándar. Inicialmente, os usuarios contan con 10 vídeos rápidos de balde, podendo obter máis mediante puntos de Microsoft Rewards.
A compañía de Redmond asegura que a ferramenta cumpre cos seus estándares de IA responsable, incorporando controis para evitar a xeración de contido nocivo e implementando marcadores de procedencia baseados no estándar C2PA en todos os vídeos.