Black Myth: Wukong vende máis de 10 millóns de copias

O xogo do momento, Black Myth: Wukong, non só leva 4 xornadas seguidas superando os 2 millóns de xogadores simultáneos en Steam, senón que nas últimas horas os seus responsables anunciaron que superou a marca dos 10 millóns de copias vendidas entre todas as plataformas nas que está dispoñible (PS5 e PC).
Estamos a falar dun éxito incontestable, especialmente salientable por estarmos ante un traballo dun estudio chinés que basea a súa narrativa na mitoloxía chinesa, polo que de partida podería parecer difícil que puidese conseguir o impacto global que está a ter realmente.
Cómpre lembrar que o xogo aínda saíu á venda o pasado martes, polo que é un dos lanzamentos máis fortes do xogo que non pertence a nunha franquía nin está baseado no xogo en liña. De feito, é o xogo para un xogador con máis usuarios simultáneos na historia de Steam (PC) e os seus responsables aseguran que sumando os xogadores de PS5 terían superado os 3 millóns de usuarios simultáneos.
A marxe de crecemento para este xogo aínda é grande, pois non só pode vender máis nas plataformas de lanzamento, senón que está previsto un futuro lanzamento para Xbox Series X|S, que aínda que probablemente non supoña un volume de compradores moi grande, podería rematar chegando a moitos usuarios no futuro a través do Game Pass, o que para Game Science sería interesante de cara ao lanzamento de novos traballo (ou incluso para a comercialización de expansións).
Tampouco podemos desbotar que estean a traballar nunha versión do xogo para a consola sucesora da Nintendo Switch, o que parece bastante probable se temos en conta que estamos ante un xogo moi asiático, e a Switch é unha das consolas de máis peso no territorio.