Boqueixón aposta novamente por apoderar dixitalmente aos seus maiores

O Concello de Boqueixón convocou co novo curso novas actividades de dinamización destinadas a apoderar dixitalmente aos maiores do termo municipal e a mellorar a súa autonomía e a súa calidade de vida. O programa inclúe o novo curso de Mente Activa, que terá lugar na vila de Lestedo todos os venres, de 11:30 a 13:00 h, e que inclúe actividades para traballar a memoria e a atención, axudando a atrasar o deterioro cognitivo.
Ademais, o programa tamén incorpora novos cursos de informática e móbil. Celebraranse os martes no Forte (sen coñecementos de 16:00 a 17:30 h. e con coñecementos previos de 17:45 a 19:15 h.) e os venres en Lestedo (con coñecementos previos, de 10:00 a 11:30 h.). O Concello explicou na presentación destas actividades que é imprescindible acudir con computador portátil. As sesións programadas van dirixidas a permitir que as persoas maiores do concello se familiaricen coa práctica cotiá do computador e dos dispositivos tecnolóxicos, de gran utilidade non só para estimular as súas capacidades cognitivas senón tamén para comunicarse, informarse e realizar todo tipo de trámites.
En ambos os dous casos, o prezo é de 15 euros/mes e os cursos terán lugar de outubro de 2025 a xuño de 2026.