Borderland 4 adianta o seu lanzamento un par de semanas

A saga Borderlands prepárase para dar un novo e espectacular salto coa chegada de Borderlands 4, que verá a luz o vindeiro 12 de setembro. Segundo anunciou o estudio desenvolvedor, esta será a entrega máis ambiciosa ata o momento, cunha dose de acción, humor e caos que promete superar todo o visto anteriormente na serie.
Este anuncio colleu bastante por sorpresa, xa que Borderlands 4 estaba previsto para o 23 de setembro, e o feito de que o xogo se adiante un par de semanas está a interpretarse como un xeito de distanciarse do que promete ser a meirande estea do ano: o lanzamento de GTA VI (aínda sen data de saída anunciada).
A nova aventura de Borderlands levaranos ao perigoso planeta Kairos, un mundo salvaxe no que os xogadores poderán dar renda solta á destrución como verdadeiros cazadores da Cámara (Vault Hunters), armados cun arsenal tolo e cheo de posibilidades.
No tráiler de presentación da data de lanzamento, xa se pode intuír parte do que está por vir: acción trepidante, inimigos desafiantes e botín a esgalla. As habilidades de acción únicas de cada personaxe permitirán controlar o ritmo dos combates, mentres novas mecánicas de movemento (como planeo, esquiva, enganche fixo ou ataque aéreo) engadirán profundidade estratéxica aos enfrontamentos.
Os xogadores poderán personalizar ao máximo o seu estilo de xogo, combinando movemento fluído e habilidades devastadoras para converterse nunha forza imparable no campo de batalla.