Brasil aposta polos drons da galega Aerocamaras para as súas inspeccións fotovoltaicas
mércores, 27 de xullo do 2022
A
compañía galega Aerocamaras, centrada no desenvolvemento de drons e
na formación, vén de despregar en Brasil os seus equipos de
vehículos aéreos non tripulados para facerse cargo dos labores de
inspección de varios dos seus parques fotovoltaicos.
A
empresa con sede en Lalín lembra que “cada vez é maior o número
de países que están a apostar por reforzar as súas fontes de
enerxía renovábeis, en parte debido á crecente demanda enerxética
que se está vivindo en todo o mundo”. Este feito impulsa a
incorporación da tecnoloxía dron como “ferramenta indispensábel”
para reducir os tempos de inspección e mellorar a precisión das
medicións, sinala.
Entre
os parques adxudicados a Aerocamaras atópase o de Pirapora, a maior
central fotovoltaica de América Latina e unha das máis extensas do
mundo. O terreo conta con máis de 800 hectáreas, equivalente a
1.200 campos de fútbol, e dá acubillo a máis dun millón de paneis
solares. O despregue realizado pola empresa galega permitirá reducir
gastos e incrementar a eficiencia e a rendibilidade: “Até o
momento a maneira convencional na comprobación de fallos nos módulos
dos paneis solares e tomas de temperaturas implicaba un elevado custo
de tempo e recursos, tanto humanos como económicos, pola gran
extensión destes parques solares. Mentres que incorporando a estes
traballos drons equipados con cámaras térmicas, infravermellas e HD
conséguese, dunha soa pasada, gravar ao completo un parque solar e
mellorar os tempos de inspección e reacción ante calquera fallo”,
explica Jaime Pereira, director executivo de Aerocamaras, que engade
que “a nosa experiencia en Brasil está a ser moi positiva, e nos
primeiros días que levamos operando cos nosos aparellos aéreos
estamos a reducir un 85% os tempos de inspección”.
Segundo
explica Pereira, co uso de drons “podemos detectar calquera
anomalía ou dano en pouco tempo para garantir que se estea xerando a
produción eléctrica esperada e tamén alargar a vida destas
estruturas”.
Tamén
fai saber que este tipo de inspeccións requiren o uso de drons de
última tecnoloxía para detectar posíbeis paneis defectuosos que
presenten variabilidade térmica debido a problemas de conexión,
danos físicos ou residuos.