Bruxelas propón abrir Android a asistentes de IA de terceiros

Piotr Serafin e Henna Virkkunen

A Comisión Europea deu a coñecer as súas conclusións preliminares sobre as medidas que Google debería aplicar para garantir a interoperabilidade de Android con servizos de terceiros, no marco dos procedementos iniciados o pasado 27 de xaneiro de 2026 ao abeiro da Lei de Mercados Dixitais (DMA).
O documento propón unha serie de actuacións destinadas a facilitar o acceso efectivo de provedores alleos ás capacidades clave do sistema operativo, especialmente no relativo á integración de servizos de intelixencia artificial. O obxectivo é permitir que estas solucións poidan interactuar coas aplicacións instaladas nos dispositivos e executar accións como enviar correos electrónicos, realizar pedidos ou compartir contidos, empregando as ferramentas preferidas polos usuarios.
As conclusións preliminares sinalan que, na actualidade, Google reserva boa parte destas funcionalidades para os seus propios servizos de IA. As medidas en estudo contemplan, entre outras cuestións, a posibilidade de que os usuarios activen asistentes alternativos mediante comandos de voz personalizados, o que abriría a porta a unha maior competencia neste ámbito.
A Comisión considera que a apertura destas capacidades permitiría aos desenvolvedores ofrecer experiencias máis integradas e avanzadas en dispositivos Android, ampliando ao mesmo tempo as opcións dispoñibles para os usuarios na Unión Europea.
Co fin de avaliar a eficacia das propostas, Bruxelas abriu unha consulta pública dirixida a todas as partes interesadas, que poderán presentar alegacións ata o 13 de maio de 2026. As achegas recibidas, xunto coas observacións de Google, poderán dar lugar a modificacións antes da adopción dunha decisión definitiva, prevista nun prazo máximo de seis meses desde o inicio do procedemento.
Este proceso desenvólvese de maneira independente á posibilidade de que a Comisión adopte decisións formais por incumprimento das obrigas establecidas pola DMA.
As actuacións forman parte dun conxunto máis amplo de investigacións abertas a comezos de ano. O pasado 16 de abril xa se presentaran conclusións preliminares relacionadas co acceso a datos de busca por parte de terceiros. A normativa europea busca garantir mercados dixitais máis xustos e competitivos, limitando o poder das grandes plataformas que actúan como intermediarias clave entre empresas e usuarios.