Bugalicia recibe fondos para sustentar a contratación de recursos electrónicos
luns, 26 de xaneiro do 2009
O Consorcio de Bibliotecas Universitarias de
Galicia (Bugalicia) recibirá durante este ano 2009 unha achega de preto de
5 millóns de euros procedentes da Xunta e das tres universidades galegas para
ser destinados á contratación de recursos electrónicos dirixidos, sobre todo, á
comunidade científica do país, aos docentes universitarios e aos estudantes de
terceiro ciclo que o soliciten.
A devandita
entidade ten como principal obxectivo apoiar de xeito continuo aos servizos
bibliotecarios das nosas institucións académicas superiores, a través da
cooperación interbibliotecaria. O seu propósito é, máis polo miúdo, favorecer a
produción científica que se está a desenvolver na nosa comunidade, poñendo a
disposición dos estudantes, docentes e investigadores “unha ferramenta tecnolóxica de enorme utilidade”.
A directora
técnica responsable da iniciativa, Victoria Millor, asegura que o meirande uso
que se lle pode dar a esta aplicación é “acceder
a través da Rede a un alto número de recursos electrónicos de información
científica”, tales como “bases de
datos, revistas e libros electrónicos, xestores bibliográficos e ferramentas
para potenciar a publicación dos investigadores das universidades galegas en
revistas de alto factor de impacto”.
O acceso aos
recursos en liña de información electrónica esténdese a toda a comunidade
universitaria e está permitido tanto dende as propias bibliotecas dos campus como
dende os departamentos dos propios investigadores, persoal docente e
universitarios de terceiro ciclo.
Máis de 20.500 e-revistas, 4.359 e-books e medio cento de bases de datos
Na actualidade a comunidade científica universitaria galega ten
acceso a múltiples bases de datos, libros e revistas electrónicas froito dos
recursos consorciados, que manteñen cubertos todos os ámbitos de coñecemento
con amplitude.
Hoxe, o volume de
revistas electrónicas accesibles grazas a Bugalicia ascende a 20.673 títulos a
texto completo, que se suman aos 4.359 libros da biblioteca en liña e preto de
medio cento de bases de datos referenciais, 46 en total.
Asemade, Bugalicia
proporciona outro tipo de material de consulta a través da Rede, como 10.517
actas de congresos e os denominados estándares, elementos de consulta
indispensable no eido das enxeñerías.
A todo isto hai
que sumarlle as ferramentas de xestión bibliográfica dixital como Refworks, que lle permiten a toda a
comunidade universitaria almacenar unha base de datos persoal de investigación,
intercambiar investigacións con colegas e descargar bibliografías en diferentes
formatos de acordo ás esixencias das diferentes publicacións.
A directora
técnica de Bugalicia, indica que a traxectoria de Bugalicia está sustentada
pola racionalización e adecuación dos recursos ás necesidades da comunidade
científica universitaria galega, e que unha parte fundamental da labor do
Consorcio é a racionalización de todos os recursos que proporciona, adecuándoos
ás liñas de investigación do Sistema Universitario de Galicia, a través do
estudo pormenorizado e continuado da produción científica dos seus
investigadores, “que entendemos e que
desenvolvemos como unha das principais liñas do noso traballo”, conclúe.