CESGA e UVigo queren impulsar o modelado como método de coñecemento do sistema terrestre
mércores, 5 de xullo do 2017
O 18 de xullo Santiago
vai dar acollida a un seminario científico para facernos avanzar no
coñecemento do medio natural mediante cálculo de altas capacidades
e outras metodoloxías TIC de deseño e predición de comportamentos.
Por exemplo a simulación do sistema terrestre. Falamos do congreso
Computación
de Altas Prestacións e Modelado de Ciencias da Atmosfera e do
Océano. O seminario, que conta co apoio da Rede Española de
Supercomputación (RES), diríxese tamén a achandar o terreo
(resolvendo retos, emendando posíbeis atrancos) para impulsar e
estender o uso do modelado dos fenómenos da terra mediante sistemas
de computación de altas prestacións, unha práctica que, tendo en
conta a deriva da Terra por mor da acción do home (principalmente o
cambio climático), será cada vez máis demandada por todo tipo de
entidades. O evento contará co apoio do Centro
de Supercomputación de Galicia (CESGA) e da Universidade de
Vigo.
Segundo informa a
devandita Rede, “as simulacións do clima ou o océano precisan dun
gran número de horas de cálculo, usando sistemas moi heteroxéneos
en ocasións e requiren dunha elevada capacidade de almacenamento e
velocidade de transmisión de datos”. A Rede Española de
Supercomputación (RES) quere dar solución a estes problemas desde
hai tempo, proporcionando recursos aos grupos de investigación que o
necesitan. Tanto o seminario científico do Santiago como outros
eventos semellantes diríxense a unificar visións arredor das
solucións implementadas ou dos modelos dispoñíbeis e soportados
nos sistemas da RES.
“Nesta xornada”,
engade a Rede, “realizarase un repaso por diversas cuestións
relacionadas coa simulación do sistema terrestre tanto desde o punto
de vista científico como computacional; ademais debateremos sobre
interpretación de resultados, optimización, novas aproximacións
tecnolóxicas así como transmisión deste coñecemento á
sociedade”.
O evento desenvolverase
no Instituto de Investigacións Agrobiológicas-CSIC, no Campus Sur
da Universidade de Santiago.