CITMAga, AIMEN e CESGA presentan en Madrid un proxecto para levar as vantaxes do cálculo avanzado ás pemes

Ofrecer ás empresas tecnoloxía matemática punteira feita na nosa terra é un dos grandes obxectivos do proxecto Hub-PET MSO-ED, que colleu impulso da man do Centro de Investigación e Tecnoloxía Matemática de Galicia (CITMAga), AIMEN, o CESGA (Centro de Supercomputación de Galicia) e o Basque Center for Applied Mathematics; e compañías como AIS Group e AnySolution, entre outras. O proxecto darase a coñecer nunha xornada o 16 de marzo en Madrid, no Barrabés Growth Space, en formato presencial e en streaming, en horario de 10 a 12.15 horas.
Segundo avanzan as ditas entidades, o Hub-PET MSO-ED achega un un portelo único no que calquera entidade poderá expor a súa problemática e as súas necesidades en materia de mellora de procesos, optimización, loxística, identificación de incidencias en procesos físicos ou aforro de enerxía. “Nun só punto ofreceránselles as solucións máis adecuadas baseadas en tecnoloxías matemáticas de vangarda, como o Machine e o Deep Learning, a estatística, a simulación, o modelado e o Big Data, entre outras moitas”, explican, engadindo que se trata dunha iniciativa “especialmente útil para as pemes, xa que lles permitirá innovar sen necesidade de dispor de persoal propio de investigación”. En palabras da investigadora galega Peregrina Quintela, presidenta da Plataforma Española de Tecnoloxías de Modelización, Simulación e Optimización nunha Contorna Dixital (PET MSO-ED), promotora do hub, “temos a ambición de que desta maneira poidamos contribuír a desenvolver un tecido industrial eficiente, seguro, sustentable, resiliente e competitivo”.