CLUSAGA mostra nun demoday en Santiago os seus revolucionarios proxectos transformadores

O Clúster Alimentario de Galicia (CLUSAGA) presentou este 1 de decembro os seus proxectos actuais de transformación, dos que xa se están a beneficiar 30 socios da entidade a través de propostas colaborativas xunto a outras empresas e entidades de investigación e innovación. Foi no marco da xornada demoday convocada baixo o epígrafe A dixitalización e industria 4.0 na transformación da industria alimentaria. A cita (celebrada na sede FEUGA, en Santiago) contou coa presenza (entre outros) do director do IGAPE, Fernando Guldrís.
Apoios do IGAPE
Guldrís sinalou que “un dos retos máis importantes do sector a medio e longo prazo é conseguir a dixitalización de toda a súa cadea, de forma que se aumente a confianza do consumidor”. Tamén destacou as distintas liñas e actuacións promovidas polo Goberno galego neste eido. Así, lembrou, o IGAPE impulsa cada ano axudas á dixitalización das pemes, con apoios que chegan ata o 50% dos gastos dos proxectos, liña que volverá a activarse no 2023; ou promoveu os chamados cheques de dixitalización para autónomos e pequenas empresas, con axudas do 80% dos gastos dos proxectos de adaptación á situación xerada pola pandemia mediante a implantación de todo tipo de tecnoloxías dixitais. Guldrís tamén puxo en valor outras actuacións como o programa Galicia Exporta Dixital, que busca apoiar ás pemes no desenvolvementos de plans empresariais de internacionalización dixital. Nesta liña, detallou, a industria alimentaria, xunto ao sector comercio e o metalmecánico, suman máis do 50% das solicitudes recibidas.
10 iniciativas
CLUSAGA, no marco do programa de apoio ás Agrupacións Empresariais Innovadoras (AEIs) que promove o Ministerio de Industria, Comercio e Turismo (MINCOTUR), impulsou máis de 10 proxectos nas últimas dúas anualidades, permitindo acelerar a transformación dixital das máis de 30 empresas socias participantes nestas iniciativas.
O clúster salientou que algúns dos proxectos impulsados neste marco durante o último ano tamén recibiron apoio do Fondo de Recuperación NextGenerationEU para a aceleración da transformación dixital.
Entidades socias beneficiarias
En concreto, ANFACO-CECOPESCA, AOTECH, ASM, Bico de Xeado, Casa Grande de Xanceda, Centro Tecnolóxico da Carne, CLUN, Cofrico, ColorSensing, DOP Mexillón de Galicia, EligeData, Entrepinares, Galacteum, Galifresh, Glaücor, Hornos Lamastelle, Innogando, Instituto Tecnolóxico de Galicia, JEALSA Rianxeira, Lugar da Veiga, Bodegas Martín Códax, Medrar Smart Solutions, Paco&Lola, Conservas Palacio de Oriente, Perfect Numbers, PSVet, Queizuar, Real Conservera Española, San Brandán, Triple Alpha e Viña Costeira foron os socios de CLUSAGA participantes nos proxectos financiados no marco desta convocatoria ao longo destes anos.
Trátase de iniciativas de investigación, desenvolvemento, innovación e aplicación de novas tecnoloxías e Industria 4.0, que favorecen o desenvolvemento de pilotos para a dixitalización do sector alimentario de Galicia.
Demoday
Como dixemos, para dar visibilidade a este proxectos, CLUSAGA organizou este xoves un demoday no Edificio FEUGA (Santiago de Compostela). No evento déronse a coñecer os proxectos xa finalizados (ML4Milk, HSI-FOOD, PHOTONICS4BAKERY e FoodTechINK), da man das empresas participantes nos mesmos. Do mesmo xeito, presentáronse as novas iniciativas de CLUSAGA en colaboración con entidades socias: MILKTELLIGENCE, MUSSELBLOCK e Smart4Cheese.
Ademais, habilitouse un espazo expositivo onde se deron a coñecer demostradores in situ as tecnoloxías aplicadas facilitando a transferencia a todo o sector, e facilitarase un espazo para o networking, permitindo establecer novas colaboracións.
Por outra banda, os proxectos ENOTECH 4.0 (Solucións de sensórica, visión artificial e Big Data para o sector vitivinícola) e máis YIELDCAN 5.0 (Procesado masivo de datos en optimización de procesos produtivos, sustentabilidade e calidade do produto en conservas de peixe), que finalizan no mes de decembro, presentaron por primeira vez os seus resultados e conclusións durante o encontro. Este evento organizouse no marco do Grupo de Traballo 2 da Comisión de Innovación e I+D de CLUSAGA, Novos modelos de produción e comercialización. Innovación en procesos e tecnoloxías. Dixitalización, cuxo obxectivo é facilitar que os seus participantes establezan ideas de proxectos colaborativos e innovadores neste ámbito.