COFER ofrece a directivos e empregados participar no Programa Xeración Dixital Pemes, con certificado en IA

A confederación ferrolá de empresas, COFER, puxo en marcha da man de Galicia Business School, un programa formativo completamente gratuíto: o Programa Xeración Dixital Pemes, que inclúe certificado en Intelixencia Artificial (IA). Como novidade, nesta edición poderán participar empresas desde 1 ata 249 traballadoras/es, incluídas persoas autónomas.
O obxectivo desta formación é capacitar ás empresas para afrontar os desafíos da era dixital e potenciar a competitividade dos seus negocios. O programa abrangue temas clave, como a adaptación ao contexto dixital, a mellora da experiencia do cliente, a implementación de tecnoloxías emerxentes, a Intelixencia Artificial e a xestión do cambio nas súas organizacións. “Todo iso desde un punto de vista práctico”, explicou a COFER, engadindo que as actividades arrincarán en setembro e contarán con 5 sesións presenciais (que se impartirán en COFER) e 24 sesións dixitais. Cun total de 146 horas.
As persoas interesadas no programa poden ampliar información e realizar inscrición na web da entidade na sección de actualidade destacada, ou ben nas redes sociais.
Esta actividade enmárcase no convenio de colaboración asinado recentemente entre COFER e Galicia Business School, que ten entre os seus fins facilitar o desenvolvemento dos profesionais e directivos da nosa área de influencia.