Cambre achega tres cursos para acelerar a transformación tecnolóxica das empresas

martes, 12 de xaneiro do 2021 Redacción

O Concello de Cambre vai comezar o ano con formación tecnolóxica para favorecer a revitalización e a transformación do tecido produtivo local. Estamos a falar do programa Cambre Dixital Empresas, que, segundo informou o local, xa acadou a inscrición de medio cento de empresas do termo municipal para participaren nos diferentes cursos que se ofrecen. O programa inclúe tres accións formativas: unha de transformación dixital, outra sobre certificados dixitais e sinaturas electrónicas e outra sobre Administración Electrónica.
Os cursos desenvolveranse estes meses de xaneiro e febreiro. O primeiro en comezar será o de Xestión do cambio e transformación dixital (18 e 21 de xaneiro) para logo iniciarse o de Certificado dixital e firma electrónica (25 e 28 de xaneiro). Días máis tarde chegará o de Administración Electrónica (1 e 4 de febreiro).
O obxectivo é “axudar ás empresas a adaptarse ao novo contexto económico xerado pola COVID-19”, optimizando a súa competitividade e a súa rendibilidade.
Unha vez rematen os cursos, o Concello levará a cabo as seguintes charlas:
· Identidade, marca persoal da empresa (8 de febreiro).
· Neuromarketing, unha forma de vender baseada na neurociencia (10 de febreiro)
· O camiño do cliente: como fidelizar aos clientes (15 de febreiro).
· Omnicanalidad, estratexia para ofrecer un mellor servizo (17 de febreiro).
· Como deseñar propostas de valor atractivas para os clientes (22 de febreiro).
· Escaparatismo dixital (24 de febreiro).
Quen desexe máis información pode obtela a través de ald@cambre.org e do teléfono 981 613 196.

PUBLICIDADE