Canon celebra os 30 anos da liña PowerShot cunha edición limitada da G7 X Mark III

Nos últimos anos as cámaras compactas de alta gama están a vivir un bo momento glorioso, con modelos como a Ricoh GR IV e a Fujifilm X100VI que, pese aos seus elevados prezos, son difíciles de mercar dada a súa elevada demanda. Aproveitando esa tendencia, co gallo da celebración do 30º aniversario da liña de cámaras compactas de PowerShot, Canon decidiu lanzar unha edición limitada da Canon PowerShot G7 X Mark III, que previsiblemente será todo un éxito de vendas, e que xa está dispoñible en reserva en España a un prezo de 949,99 euros coa previsión de que chegue aos compradores a partir do vindeiro 23 de abril.
Estamos ante unha cámara que dista moito do que ofrecían as primeiras PowerShot, pois permite captar imaxes de 20,1 Mpíxeles a través do seu sensor CMOS empillado dunha polgada, ten un obxectivo grande angular (24mm) cun zoom de 4,2x, pode gravar vídeo 4K, ofrece cámara lenta a 120 imaxes por segundo en Full HD, conta cunha pantalla táctil abatible de 3 polgadas, integra flash retráctil, ofrece conectividade Bluetooth e Wi-Fi coa posibilidade de transmitir en directo a través de YouTube e incluso conta con saída micro HDMI e entrada de micrófono, polo que estamos ante un produto moi axeitado para creadores de contido.
A propia marca promociona este tipo de cámaras como un dispositivo que pode levarse no peto e serve para crear contidos impresionantes para Instagram ou TikTok, conseguindo boas tomas en escenarios nos que smartphone non é capaz (como contornos pouco iluminados).
Queda agora por ver se Canon conseguirá que esta cámara capte tanta atención como os modelos equivalentes dos seus competidores máis directos.