Canon comercializa unha divertida impresora fotográfica

Sacar ao mercado trebellos electrónicos en cor rosa ou vermella para atraer ao público feminino son estratexias que demostraron funcionar no pasado, pero algunhas empresas van moito máis aló e personalizan os seus dispositivos con motivos arriscados como deseños de Ágatha Ruiz de la Prada ou de Hello Kitty. Nesta última liña entrou Canon, e colleu a súa impresora fotográfica Selphy CP770 e lles engadiu a imaxe dos michos nipóns máis comerciais da historia, nunha edición que polo momento só se pode mercar no Xapón.
Pero o modelo de Hello Kitty da impresora de Canon só é unha desculpa para falar desta excelente impresora que vén de chegar ao mercado europeo, onde se vende por uns 142 euros, o que non está nada mal se temos en conta que se trata dunha impresora cunha pantalla LCD de 2,5 polgadas, lector de tarxetas de memoria (SD, miniSD, MMC, RS-MMC, MS, MS Duo e Compact Flash), compatible con PictBridge ou Canon Direct Print (tecnoloxías integradas en moitas cámaras compactas do mercado para facer directamente a impresión sen ter que utilizar un ordenador), axustes automáticos para mellorar a calidade das fotografías (contando incluso coa opción de eliminar o molesto efecto de ollos vermellos) e detalles realmente interesantes como un estoxo especial para gardar os accesorios, o papel e a tinta da impresora, un revestimento de protección especial que garante que as impresións estean secas dende o primeiro momento (combinado cunha resistencia que fai que as impresións se poidan manter con calidade durante 100 anos) e unha velocidade bastante boa (52 segundos por impresión).
Amais tamén é posible comunicar a impresora co móbil por infravermellos ou por Bluetooth (cun adaptador opcional).