Canon lanza unha aplicación para usar as súas cámaras a xeito de webcams USB

Conscientes das dificultades para atopar unha webcam no mercado actualmente, dende Canon quixeron facer a vida máis fácil aos seus clientes, e publicaron unha nova aplicación en proba que permite converter varias das súas cámaras dixitais en cámaras USB para así poder empregalas como unhas webcams de grande calidade, o que resulta especialmente práctico en ordenadores de sobremesa que habitualmente non están dotados de cámara web.
Coa nova aplicación chega con conectar a cámara (en modo película) ao ordenador por USB para poder configurala como unha cámara web ordinaria e así poder empregala na nosa aplicación de videoconferencia favorita, sen precisar de ningún tipo de capturadora ou accesorio semellante.
Entre as cámaras de Canon compatibles coa nova aplicación están dende a compacta PowerShot G5X Mark 1 até a cámara sen espello EOS R, pasando por réflex como a EOS 90D, equipos que xa empregaban moitos creadores de contidos para retransmisións en vivo, pero para o que empregaban as saídas HDMI das cámaras a través dunha capturadora, cando agora chega con instalar unha simple aplicación que permite recoñecer estes dispostiivos como webcams, o que resulta extraordinariamente práctico nun momento no que as webcams son un produto con serios problemas de abastecemento.