Carmela Troncoso, á fronte do equipo de Privacidade e Seguridade de Gradiant
luns, 23 de marzo do 2015
A enxeñeira viguesa
Carmela Troncoso, da que falamos recentemente para dar conta da
súa presenza en Amsterdam (no simposio PETS,
amosando os traballos despregados por Gradiant en materia de
simulación de tráfico e transporte) e
da súa participación en HomSec (onde expuxo os detalles dunha
tecnoloxía que faría posíbel a detección eficaz de posíbeis
terroristas en voos de tipo comercial),
é a nova responsábel do equipo de Privacidade e Seguridade de
Gradiant, en palabras do centro tecnolóxico vigués “unha task
force especializada que reforzará a posición de Gradiant nun
eido no que xa acumula unha importante bagaxe, con participación en
proxectos europeos e nacionais”, como SCAPE ou PRISMED, aos que
cómpre engadir as iniciativas PRIPARE ou WITDOM, un
proxecto que se dirixe en boa medida a fornecer unha nube máis
segura e fiábel.
Deste xeito, Carmela
Troncoso, até o de agora enxeñeira post doutoral en Gradiant, terá
entre mans a responsabilidade de dirixir unha temática de gran
potencial de crecemento no centro tecnolóxico. De feito, a
actividade do mesmo en cuestións ligadas á privacidade e a
seguridade multiplicouse nos últimos meses, “intensificándose de
forma especial as colaboracións en eventos e foros de máxima
relevancia para a investigación e a industria”. Así, aparte da
presenza no PETS ou en HomSec, Troncoso participou no Real Word
Crypto en Londres, no kick-off do proxecto WITDOM
en Madrid ou na Computer Privacy and Data Protection de
Bruxelas, entre outros eventos de alcance internacional.
Lembrar que a doutora
Troncoso é enxeñeira de Telecomunicacións pola Universidade de
Vigo. En outubro de 2006 uniuse ao grupo de investigación COSIC na
Katholieke Universiteit Leuven (Bélxica) como estudante de
doutoramento, finalizando en abril de 2011. A súa tese Design and
Analysis methods for Privacy Technologies parcialmente financiada
pola Fundación Barrié de la Maza, recibiu o premio á mellor tese
doutoral en materia de seguridade do Consorcio Europeo de
Investigación en Informática e Matemáticas. Carmela realizou
estadías nunha manchea de grupos de investigación coñecidos en
todo o mundo, como por exemplo o Microsoft Research Cambridge, o
grupo Hatswich na Universidade de Illinois en Urbana-Champaign, ou o
laboratorio LCA1 na École Polytechnique Fédérale de Lausanne. En
outubro de 2012 incorpórase a Gradiant grazas ao proxecto europeo
LIFTGATE.