Catro de cada cinco empresas tecnolóxicas galegas usan software libre

Un 84,6% das empresas TIC galegas dispoñen de software libre instalado nos seus equipos, tanto ordenadores persoais como servidores, segundo os resultados do informe que hoxe publica o OSIMGA, referido a datos de 2023 recollidos polo INE na Enquisa sobre o uso de TIC e comercio electrónico nas empresas.
O informe do Observatorio, adscrito á AMTEGA, destaca que os produtos de software que máis habitualmente ofertan as empresas TIC de Galicia son os de xestión de negocio; sistemas de virtualización, servidores e aplicacións na nube; e xestión de contidos, páxinas web, e márketing dixital. Preto da metade das empresas que venden software en Galicia (un 47,3%) ofrecen solucións libres.
En canto aos produtos de software libre, os máis ofertados son para a xestión de contidos de paxinas web e márketing dixital, aplicacións para dispositivos móbiles e xestión de negocio. No caso das ferramentas de aprendizaxe en liña, hai máis empresas que ofrecen solucións libres ca privativas.

Debilidades e fortalezas do software libre

As razóns polas que as empresas afirman non contar con máis software libre son principalmente a percepción de que «non ofrecen as prestacións necesarias» (36,5%), seguido da opinión da «falta de provedores ou soporte» (32,4%). O principal motivo polo que as empresas non ofrecen produtos baseado en solucións libres é que non está na liña de negocio da empresa. A maioría dos usuarios perciben o custe do software libre como principal vantaxe.