Cedeira impulsa o turismo local na súa web
venres, 28 de xullo do 2017
O turismo e as redes seguen a circular xuntos, coma
un vehículo co seu motor. Entre os exemplos recentes desta axeitada
combinación sitúase unha iniciativa concreta do
Concello de Cedeira, que coa chegada do verán vén de impulsar o
sector turístico coa posta en funcionamento dun portal específico
(Cedeira Turismo)) na páxina web institucional, www.cedeira.gal.
Segundo informou o Goberno local, a idea era lograr que os atractivos
(turísticos, hostaleiros, gastronómicos, naturais, patrimoniais,
etc) do concello viñeran cara ao internauta dun xeito directo e sen
extravíos. En palabras do Concello, “a golpe de clic os
interesados poden acceder a todos os contidos necesarios para ter
unha visión ampla e completa dos recursos e posibilidades que o
municipio ofrece cara aos visitantes”.
O portal Cedeira Turismo preséntase con imaxes
representativas do concello coruñés e acubilla no seu seo unha
serie de seccións para coñecermos, entre outras cousas, onde se
atopa Cedeira, o horario da oficina de turismo ou que descargas
podemos facer no noso móbil ou tableta relacionadas cos recursos
locais (visitas guiadas). Tamén podemos deixar as nosas suxestións
nunha caixa de correo para que poidan terse en conta polos
responsábeis municipais.
Segundo explicou o Concello, o servizo Coñece
Cedeira é “a mellor ferramenta para entrar en contacto coa oferta
máis turística do municipio: para obter información sobre as
características das praias, para saber como chegar aos mellores
miradoiros ou para achegarnos á historia de San Andrés de Teixido”.
O portal complétase cun rueiro e cun feixe de nomes de lugares nos
que comer ou durmir.