Ceden ao Arquivo Sonoro de Galicia a Fonoteca Escolas Proval

A presidenta do Consello da Cultura Galega (CCG), Rosario Álvarez, e a directora do IES Escolas Proval, María Pilar Piay Pombo, asinaron este venres 3 de xaneiro o acordo da cesión deste centro ao Arquivo Sonoro de Galicia, centro dependente do CCG, da Fonoteca Escolas Proval.
“Agradecemos esta cesión que ten un gran valor filolóxico, histórico e musicolóxico” apuntou a presidenta do CCG.
Pola súa banda, a directora do IES Escolas Proval, destacou que se trata “dun acto de homenaxe aos profesores María Xosé González Chamorro e Bieito Legaspi que promoveron desde as súas aulas este traballo de recollida oral“.
O material cedido está composto de 320 rexistros realizados por preto de 500 escolares deste centro entre 1989 e 2004. O material deposítase no Arquivo Sonoro de Galicia para a súa custodia e posterior dixitalización.
O fondo Fonoteca Escolas Proval está composto por 320 rexistros, dos que 211 son traballos escritos e 233 rexistros sonoros no que participaron preto de 500 estudantes e outros tantos informantes. Segundo explicou o CCG, a fonoteca “destaca pola variada, numerosa e singular colección de temas reunidos relacionados cos usos e costumes populares e dos moitos xéneros propios da literatura e da música de tradición oral rexistrados: lendas, refráns, adiviñas, romances, arrolos, bailábeis… e inclúe tamén abundantes e interesantes testemuñas sobre a vida cotiá neste territorio durante o século XX.
O Arquivo Sonoro de Galicia (ASG) foi creado polo Consello da Cultura Galega e está dispoñíbel na Rede. Trátase dun repositorio en liña que ten como propósito a recuperación do patrimonio sonoro galego e xorde coa pretensión de se converter no eixe aglutinador en Galicia das distintas iniciativas públicas e privadas que traballan con este mesmo afán: salvagardar o noso patrimonio sonoro cara á construción dunha identidade presente e futura.
A totalidade dos fondos documentais do Arquivo Sonoro de Galicia están dispoñibles para investigadores e estudosos do noso patrimonio sonoro.
O ASG leva a cabo, regularmente, actividades e xornadas destinadas a difundir distintos aspectos relacionados co patrimonio sonoro, como as cinco edicións do Encontro O Son da Memoria, cada unha delas adicada a un tema (tradición oral, música na emigración, música tradicional, arquivos sonoros e propiedade intelectual e metodoloxías de arquivo).