Celebrado o primeiro coloquio da versión virtual do Día das Redes Galegas
venres, 30 de outubro do 2020
Este
venres
desenvolveuse a primeira sesión da celebración máis virtual do Día
das Redes Galegas, que este ano, por mor da COVID, converteuse
nunha serie de encontros en liña arredor da frutífera confluencia
entre as novas tecnoloxías e a nosa lingua. A conmemoración veu
novamente da man da Facultade de Ciencias Sociais e da Comunicación
(Campus de Pontevedra), concretamente dos profesores Alberto Dafonte
e Andrés Fraga coa colaboración da Área de Normalización
Lingüística (ANL) da Universidade de Vigo e da Secretaría Xeral de
Política Lingüística da Xunta de Galicia. O ciclo Redes Galegas
celebrou na noite deste xoves a súa primeira sesión, protagonizada
pola da xornalista María Yañéz e do youtubeiro Mario
Brión.
Previamente,
o secretario xeral de Política Lingüística, Valentín García; o
decano en funcións de Ciencias Sociais e da Comunicación, Xosé
Baamonde; o director da ANL, Fernando Ramallo, e Dafonte inauguraron
unha actividade que “este ano ten máis sentido ca nunca”, como
salientou García, quen puxo o acento no papel que as redes sociais
poden xogar “na proxección e fomento do uso da nosa lingua, sobre
todo en certas franxas de idade”.
Ramallo
subliñou que constitúen un “elemento central na promoción,
mobilización e divulgación da lingua”, especialmente entre a
poboación menor de 40 anos, “que está un pouco máis afastada do
galego”.
Baamonde,
pola súa banda, sinalou que as e os profesionais que participarán
nos tres coloquios que integran o programa, varios formados na
facultade, “demostran que hai que ir máis aló da queixa e
propoñer e elaborar contidos en galego”.
Mario
Brión, ex-estudante da UVigo, achegou ao coloquio moderado por
Andrés Fraga a súa experiencia na canle Olaxonmario.
Brión puxo o acento en como a “democratización da cultura sen
precedentes” que implica o mundo dixital “ofrece a posibilidade
de que culturas non hexemónicas poidan ter o seu espazo e incluso
crear o seu propio mercado”. No caso do galego, a pesares de
existiren proxectos que “están a gañar audiencias considerábeis,
sobre todo entre a rapazada”, as iniciativas que se están a
desenvolver, sinalou, “son dispersas e faltas dunha liña
estratéxica concreta para optimizar o contido en función dos
requirimentos das audiencias”.
Tras
esta primeira xornada, Redes Galegas contará o 5 de novembro coa
participación da ex-alumna Adriana Villamisar, directora de arte na
axencia Nasas, e da profesora Pilar Ponte, impulsora da iniciativa 21
días co galego. A última sesión, o 12 de novembro, reunirá
aos tamén egresados David Sousa, director creativo en Mustache, e
María Reimunde, responsábel de mercadotecnia dixital de captación
en Campus Training.