Celebran unha manifestación fronte a unha sede virtual do PSOE en Second Life
mércores, 16 de maio do 2007
Os acontecementos políticos en Second Life están
pasando de iniciativas innovadoras e anecdóticas a situacións máis esperpénticas,
como a manifestación virtual que se convocou esta semana fronte a sede do PSOE
de Oviedo (a única que ten o partido neste mundo virtual) á que acudiron
preto dun cento de manifestantes con
bandeiras españolas e pancartas coa frase “De Juana a la cárcel”.
Pero esta
concentración se disolveu dun xeito brusco, xa que o administrador da illa
na que está a sede socialista en Second Life expulsou ós participantes na
manifestación e vetou o seu acceso ó espazo, aínda que moitos deles volveron a
ingresar no sistema con outros avatares para reincorporarse á manifestación dun
xeito máis calmo.
Todo este tumulto foi provocado por unha discusión dun usuario de Second Life
cos responsables do local virtual do PSOE, que rematou con acusacións e
insultos e o levaron a mobilizar a amigos e coñecidos para protestar contra o
Partido Socialista e o trato recibido por De Juana, aínda que o máis
sorprendente podería ser o feito de que a
manifestación se está a alongar no tempo, e non ten unha duración efémera
como acontece coas mobilizacións no mundo real.