César Hidalgo presenta nos #CiTIUSTalks o seu libro sobre as futuras interaccións entre homes e máquinas
luns, 28 de xuño do 2021
Analizar
o papel que imos xogar nun futuro onde as máquinas están destinadas
a tomar milleiros de decisións relativas ao noso día a día,
persoal e laboral, será un dos eixes temáticos da charla do
investigador e divulgador César Hidalgo que ofrece o
CiTIUS da USC este mércores 30 de xuño, a partir das 12.00
horas, abeirada ao ciclo #CiTIUSTalks e convocada baixo o seguinte
epígrafe: Como os humanos xulgan ás máquinas.
Máis
polo miúdo, César
Hidalgo presentará no CiTIUS o libro How Humans Judge Machines
(Como os humanos xulgan ás máquinas), ao longo dunha
charla virtual na que comparará as reaccións das persoas ante as
accións realizadas por humanos e máquinas. Utilizando datos
recompilados en ducias de experimentos, o libro revela os rumbos que
impregnan as interaccións entre nós e as tecnoloxías avanzadas.
O
investigador César Hidalgo é director do Centro de Aprendizaxe
Colectiva do Instituto de Intelixencia Artificial e Natural (ANITI)
da Universidade de Toulouse (Francia). A partir de experimentos
aleatorios, Hidalgo e os seus colaboradores crean contrafactuais
reveladores e constrúen modelos estatísticos para explicar como as
persoas xulgamos a Intelixencia Artificial (IA), e se o facemos de
maneira xusta ou non. “Trátase dunha investigación orixinal, que
nos achega un paso máis a comprender as consecuencias éticas da
Intelixencia Artificial”, adianta o CiTIUS, lembrando que o
traballo How Humans Judge Machines pódese ler de forma
gratuíta na Rede.