ChatGPT proba os chats de grupo

OpenAI iniciou hoxe en varios países unha fase de probas dos novos chats de grupo en ChatGPT, unha funcionalidade que permite incorporar varias persoas nunha mesma conversa xunto co asistente de IA para planificar actividades, tomar decisións ou traballar de forma compartida. A novidade chega como un primeiro paso cara a experiencias máis colaborativas dentro da plataforma, coa intención de aprender dos comentarios iniciais antes de estender o servizo a máis rexións e plans.
Estes chats permiten reunir amigos, familiares ou compañeiros nun espazo común no que ChatGPT pode ofrecer axuda en tarefas tan diversas como organizar unha cea, preparar unha viaxe ou elaborar documentos en equipo. Estes novos espazos funcionan de maneira independente ás conversas privadas, e a memoria persoal de cada usuario non se comparte nunca cos demais participantes.
A proba está a comezar a implantarse en dispositivos móbiles e na web para usuarios con sesión iniciada nos plans ChatGPT Free, Go, Plus e Pro en Xapón, Nova Celandia, Corea do Sur e Taiwán. O obxectivo é analizar como se emprega esta función e definir os seguintes pasos para a súa expansión global.
Os chats de grupo poden ser útiles para organizar actividades sociais, como comparar destinos para unha escapada de fin de semana, preparar itinerarios compartidos ou consensuar listaxes de equipaxe. Tamén poden servir para proxectos máis prácticos, desde deseñar un xardín ata escoller obras de arte para un piso novo, ou para facilitar decisións colectivas sobre restaurantes, plans de ocio ou debates amigables. No ámbito laboral e educativo permiten redactar borradores en equipo, investigar temas comúns ou compartir materiais para que ChatGPT axude a resumir e ordenar a información.
Para iniciar un chat de grupo abonda con tocar a icona de persoas na esquina superior dereita dunha conversa nova ou xa existente. Se se engade alguén a un chat previo, créase automaticamente unha copia que conserva a conversa orixinal por separado. Pódense invitar ata vinte persoas mediante unha ligazón que calquera membro do grupo pode compartir. Ao entrar por primeira vez será preciso configurar un pequeno perfil con nome, usuario e foto. Os chats de grupo quedan almacenados nunha nova sección da barra lateral para facilitar o acceso.
O funcionamento é semellante ao das conversacións habituais, pero con participantes adicionais. As respostas xéraas GPT-5.1 Auto, que selecciona o modelo máis axeitado segundo o plan do usuario. As ferramentas habituais están dispoñibles: busca, carga de imaxes e arquivos, creación de imaxes e ditado. Os límites de uso aplícanse unicamente cando ChatGPT responde, e contabilízanse para o límite da persoa á que está a responder.
OpenAI explica que ChatGPT incorpora novos comportamentos sociais para estes espazos compartidos, reaccionando con emojis, facendo referencia ás fotos de perfil e intervindo unicamente cando a conversa o pide, salvo que algún participante lle dirixa explicitamente unha mensaxe escribindo «ChatGPT».
A configuración do grupo permite asignar un nome, engadir ou retirar participantes, silenciar notificacións ou definir instrucións personalizadas sobre como debe responder o asistente en cada chat.
No apartado de privacidade, OpenAI subliña que estes chats están totalmente separados das conversas privadas. A memoria persoal non se emprega nin se xera novo contido de memoria a partir do que se diga nestes grupos. Todos os participantes poden ver quen está no chat, aceptar ou rexeitar invitacións e abandonar cando o desexen. Só o creador non pode ser expulsado, agás se decide marchar pola súa propia vontade. Para usuarios menores de 18 anos establécense salvagardas adicionais que reducen automaticamente a exposición a contidos sensibles, e os titores poden desactivar esta función mediante os controis paternos.