Chega Feiradoc.gal, o documental interactivo sobre a feira galega contemporánea
venres, 2 de marzo do 2018
Finalmente,
o
documental interactivo sobre a feira galega e o seu relevante papel
socioeconómico na nosa historia recente e antiga, vén de ser
lanzado na Rede a través da páxina web específica feiradoc.gal,
un sitio dixital que plasma á perfección o espírito da peza
audiovisual e que salienta en parte
pola súa
calidade visual e informativa e en parte
tamén polo seu compoñente de preservación dunha realidade en
vieiros de desaparecer. O documental,
como lembraremos, foi desenvolvido ao abeiro da segunda Bolsa Nacho
Mirás para novos titulados, convocada polo Colexio Profesional de
Xornalistas de Galicia e máis ABANCA. A obra foi dirixida por Laura
Santos e Jorge Váquez e, segundo nos conta o colexio, “reúne
testemuños de feirantes nas catro provincias galegas, para construír
unha visión ampla do que supón o mercado tradicional nas nosas
vilas”.
O
documental, amais
de destacar polo achegamento que propón a unha práctica social e
económica que se remonta a unha manchea de séculos atrás (que nos
define e que ao mesmo tempo está en risco de esmorecer por mor do
afianzamento de novos modelos produtivos e sociais), tamén salienta
polo seu compoñente innovador. Segundo lembran os responsábeis da
obra, o compoñente interactivo
“permítelle ao usuario decidir por onde quere seguir o seu camiño
virtual polas feiras do país”, un
camiño percorrido na compaña dos feirantes e os seus relatos, as
máis das veces saudosos dos tempos en que as feiras eran un
fervedoiro de xente procedente
de todos os recantos da nosa terra
(os grandes e históricos mercados de gando das nosas vilas e
cidades).
Os
directores do proxecto, Laura Santos e Jorge Vázquez, tamén
poñen o foco no
“feito de facer memoria dixital e deixar pegada preservando relatos
que antes ou despois desaparecerán”. Ao
seu xuízo, proxectos coma este son “un xeito
de seguir formándonos, de experimentar cos formatos e de darlle
visibilidade a un fenómeno de moito peso na nosa sociedade".
Ambos os dous teñen traballado en proxectos dixitais, son titulados
en Comunicación Audiovisual pola Universidade da Coruña. Laura
Santos cursa o Máster en Direccción de Arte Publicitaria, Jorge
Vázquez é Máster en Comunicación e Industrias Creativas e
investigador doutorando na Universidade de Santiago de Compostela,
onde estuda as narrativas de non ficción interactiva.
O
documental interactivo ten presenza en Facebook e Instagram,
onde os interesados poderán seguir as novidades do proxecto e enviar
as súas visións en formato audiovisual para facer de Feira
unha obra colaborativa.