Chega Myur!, a aplicación coruñesa que permite alugar produtos e fomentar o consumo responsábel

mércores, 7 de xullo do 2021 S. P.

O panorama de aplicacións móbiles que nos axudan á tarefa tan crucial de ser máis sustentábeis e de apostar pola economía circular segue a enriquecerse. Dende A Coruña chegounos estes días a que sen dúbida é unha das máis destacadas, sobre todo porque nos permite obter rendementos ao tempo que favorecemos o consumo responsábel: a ferramenta Myur! En concreto, trátase dunha aplicación de alugueiro de produtos entre persoas que se queiran desmarcar da febre consumista e gañar diñeiro dando un segundo uso a obxectos que xa non utilizan. É polo tanto un servizo onde podemos emprestar cousas que non empregamos (ferramentas, vehículos, material electrónico, equipos de traballo, accesorios para viaxes, instrumentos musicais, servizos de formación, etc) a diario e alugar aquilo que precisamos por tempo limitado.
“A nosa tecnoloxía”, cóntanos o equipo responsábel deste desenvolvemento, “está desenvolvida para crear unha experiencia de usuario fácil, sinxela e segura, ofrecendo diferentes verificacións ao longo do proceso de alugueiro: identificación dos usuarios, fotos ao iniciar e finalizar o alugueiro, pago asegurado ao rematar o préstamo”.
A aplicación xa está dispoñíbel para dispositivos con Android e iOS, e tamén se achega en versión web. Segundo indican os impulsores desta startup coruñesa, “calquera usuario pode alugar calquera cousa por unha cantidade fixada á hora, ao día, semana ou mes e, opcionalmente, pódese pedir unha fianza que se reterá durante o aluguer e devolverase sempre que o obxecto se devolva nas mesmas condicións nas que se alugou”.
Lecer.app
Amais de Myur!, o equipo coruñés puxo en marcha este 2021 un segundo proxecto tecnolóxico, Lecer.app, que como se indica no seu nome, constitúe un servizo para axudarnos a desfrutar do noso tempo libre. Poderemos atopar ofertas, suxestións e ideas para todo tipo de lecer, idade e intereses. “Lecer non é só para as vacacións”, explican, engadindo que “o seu obxectivo é formar parte da vida diaria dos usuarios como ferramenta para sacar o máximo partido ao noso tempo libre”.


PUBLICIDADE