Chega a 14ª xeración de procesadores Intel Core para ordenadores de sobremesa

martes, 17 de outubro do 2023 Marcus Fernández

Os procesadores Intel Core de 14ª xeración para equipos de escritorio xa son unha realidade, encabezados polo procesador Intel Core i9-14900K, que destaca por soportar velocidades de reloxo de até 6 GHz, polo que resulta ideal para os afeccionados aos videoxogos que queren conseguir o máximo rendemento, mentres que os procesadores Intel Core i7-14700K ofrecen un 25% máis núcleos, resultando ideais para creadores que poderán tirar proveito destes procesadores para as grandes cargas de traballo multi-fío.
De lanzamento temos 6 novos procesadores de escritorio, con até 24 e 32 núcleos, e inician a súa comercialización hoxe mesmo.
Esta 14ª xeración de procesadores de Intel achegan até un 23% de incremento no desempeño en videoxogos, contan con grandes posibilidades para realizar overclocking, son compatibles con chipsets Intel 600/700 (facilitando así a actualización dende equipos actuais) e tamén inclúen unha conectividade moi avanzada, como conectividade Wi-Fi 6/6E e Bluetooth 5.3 integradas ou a posibilidade de incorporarlle Wi-Fi 7 e Bluetooth 5.4. Estes procesadores tamén soportan conexións Thunderbolt 4 e Thunderbolt 5, soportando así conexións de cable de até 80 Gbps.

PUBLICIDADE