Chega ao mercado a baliza conectada Hella V-16 froito da colaboración entre Hella e a galega Netun

martes, 1 de agosto do 2023 S. P.

Baliza conectada para o automóbil nunha imaxe de Jorge Costas

Hella, fabricante alemán de compoñentes electrónicos e de iluminación para a industria do automóbil, anunciou o lanzamento ao mercado da súa baliza V-16 conectada coa DXT (Dirección Xeral de Tráfico). Trátase da baliza conectada Hella V-16, un elemento de sinalización que será equipamento obrigatorio en todos os vehículos a partir de xaneiro de 2026. Este produto é froito da colaboración entre Hella e Netun Solutions, empresa galega pioneira en solucións de sinalización de elementos e incidentes na estrada.
Segundo explican as empresas, o dispositivo destaca “polo seu innovador deseño, a súa tecnoloxía LED e o seu dispersor transparente”, ao que se engade “unha iluminación inmellorábel que garante que o vehículo sexa visíbel en todas direccións a un quilómetro de distancia, aínda en condicións de baixa luminosidade”
Hella e Netun engaden que “a baliza Hella V-16 foi deseñada co obxectivo de salvar vidas na estrada, permitindo sinalizar un vehículo accidentado ou detido na vía sen necesidade de que os seus ocupantes abandonen o habitáculo”.
Este dispositivo conectado envía de maneira inmediata, automática e anónima unha notificación ao centro de control de tráfico da DXT para indicar a xeolocalización do vehículo. Esta información é compartida en tempo real a través da Plataforma DXT 3.0 e do Punto de Acceso Nacional aos demais usuarios da vía que reciben a notificación, tanto nos paneis de información que hai nas estradas coma nas aplicacións de mobilidade no seu teléfono e nos propios coches conectados.
“De acordo co Real Decreto de Auxilio na estrada, as balizas V-16 xa son o substituto legal dos triángulos de emerxencia e se ben na actualidade pódese usar calquera dos dous dispositivos para sinalizar un incidente na estrada, a situación mudará a partir do 1 de xaneiro de 2026, cando os triángulos de seguridade deixarán de estar permitidos e será obrigatorio levar unha baliza V-16 conectada, como a de Hella”, explican dende Netun, lembrando que a día de hoxe existen dous modelos V-16 no mercado, con e sen conexión. A V-16 conectada será a única baliza legal a partir de xaneiro de 2026, “polo que quen a adquira xa non terá que facer un dobre investimento”.
A baliza conectada Hella V-16 fabrícase en España, estará dispoñíbel no mercado en agosto, a un prezo de venda recomendado de 54,95 €. O prezo inclúe conectividade á plataforma DXT 3.0 ata finais de 2037, tal e como establece a normativa.

PUBLICIDADE