Chega dende o CITIC un novo curso online sobre participación activa en diversidade funcional
mércores, 22 de xaneiro do 2020
O
Centro de Investigación TIC da Universidade da Coruña vén de facer
unha relevante contribución ás tecnoloxías que derruban barreiras
para a accesibilidade e a inclusión. Segundo informan fontes do
CITIC, un grupo de investigadoras e investigadores do centro
organizou o curso MOOC (cursos online masivos e abertos polas
súas siglas en inglés) sobre Tecnoloxías
para a participación activa en diversidade funcional,
acollido xa na plataforma MiríadaX.
O
curso dará comezo o vindeiro mes, o 10 de febreiro, e é de
inscrición libre e gratuíta. Estará impartido polo subdirector do
CITIC Javier Pereira e as investigadoras Betania Groba, Laura Neto e
Thais Pousada.
En
palabras do CITIC, este MOOC ofrece “unha perspectiva práctica e
completa sobre as características, funcionamento e aplicacións de
diferentes produtos de apoio, programas, aplicacións móbiles,
software de programación e robótica”. O obxectivo é que os
participantes “adquiran coñecementos básicos sobre diferentes
recursos para a promoción da autonomía e a participación das
persoas con diversidade funcional”.
O
MOOC está composto por 4 módulos (un por semana), cunha dedicación
horaria de 4 horas por semana para a lectura e visualización dos
materiais básicos de formación, así como para a realización das
actividades propostas e participación nos foros.