Chegan ás tendas os personaxes de Looney Tunes Deportes Galácticos

xoves, 28 de maio do 2015 Redacción

Sony Computer Entertainment España (SCE España) anunciou a chegada ao mercado español de Looney Tunes Deportes Galácticos, un xogo exclusivo para PlayStation Vita que foi desenvolvido, precisamente, por un estudio emprazado en territorio estatal, Virtual Toys, cuxos responsábeis dérono a coñecer esta semana en Madrid. O xogo está dispoñíbel en formato físico a un prezo estimado de 29,99 euros e en formato dixital para descarga na PlayStation Store a un prezo de 24,99 euros. O acto de presentación contou coa presenza de Fabriciano Bayo, director de Virtual Toys e Santiago Cobo, produtor do xogo, onde estiveron arroupados por Roberto Yeste.
Segundo fixeron saber os responsábeis deste desenvolvemento protagonizado por algúns dos máis míticos personaxes do cartoon da casa Warner (como por exemplo Bugs Bunny), “é un orgullo ter creado e lanzado este título para a pequena de PlayStation, un título desenvolvido integramente en España como froito ademais dun acordo cunha gran compañía como Warner e que estamos seguros será un éxito entre os nenos”.
Looney Tunes: Deportes Galácticos é o primeiro título español lanzado pola compañía en 2015, ao que se sumarán outros proximamente, froito “da continua aposta de PlayStation España polo talento nacional”, informaron dende Sony, que ao fío do argumento sinalaron que xira arredor dunha “gran variedade de aloucadas disciplinas olímpicas”, poñéndonos na pel dos nosos personaxes favoritos dos icónicos debuxos animados de Warner Bros: Bugs Bunny, o Pato Lucas, o Coiote ou o Demo de Tasmania, entre outros. As disciplinas deportivas dispoñíbeis son: Carreiras no Espazo, Deportes Acuáticos, Boxeo no Espazo, Tiro con Arco Galáctico, Tiro ao Prato e Golf Galáctico. Deste xeito, os atletas de Warner terán que superar desafíos cada vez “máis delirantes” para acadar os puntos de experiencia e as moedas, cos que os usuarios poderáb desbloquear novos personaxes de Looney Tunes, cada un coas súas propias habilidades.

PUBLICIDADE