Cilenis publica un xogo móbil de palabras asociadas e películas cinematográficas

A compañía galega Cilenis, especializada en tecnoloxía lingüística, non quere limitar a súa achega ao lecer coa aportación do galego aos populares xogos Apalabrados e Mezcladitos de Etermax, senón que tamén tiveron a ben crear un videoxogo de seu, WovieGame, que podemos descargar de balde para iOS e para Android, que consiste en quendas de 60 segundos nos que veremos unha serie de palabras chave nunha nube que pretenden servir de pistas para adiviñar o título dunha das 4 películas que propón a aplicación (de entre máis de 150 filmes).
As palabras están referidas a personaxes, diálogos, lugares... de xeito que este xogo serviría para medir os coñecementos cinematográficos do usuario. Para facer esta selección de palabras empregouse a tecnoloxía de CilenisAPI, un produto de enxeñaría lingüística que está en fase de probas e que mediante a súa ferramenta Keyword Extractor adquiriu as palabras máis relevantes dos subtítulos das películas incluídas nesta aplicación desenvolvida por Cristina Rey e Fernando Blanco.