Cinfo sumou en abril 15.000 usuarios rexistrados en Tiivii.gal e chegou aos 1.000 partidos emitidos

A empresa coruñesa Cinfo fixo en abril un balance dos fitos acadados pola súa plataforma Tiivii.gal, un balance no que destacan dous grandes datos: por unha banda os 15.000 usuarios rexistrados e pola outra os 1.000 partidos transmitidos xa a través da tecnoloxía, coa que, en palabras de Cinfo, “levamos a emoción do deporte a todos os recunchos de Galicia”.
Cinfo tamén salienta que a través de Tiivii.gal non só se retransmiten partidos, “lideramos un sistema de produción xestionado por Intelixencia Artificial, seguindo de preto deportes como o fútbol, fútbol sala, balonmán, baloncesto, hóckey sobre patíns, voleibol e rugby”.
Tamén indican que a plataforma de streaming permite a calquera usuario acceder vía web, dispositivos móbiles ou descargándose aplicacións para televisión (Samsung, LG, Android TV, Apple TV e Amazon Firestick), á cobertura de máis de 100 campos en toda Galicia cada fin de semana. “Así, aseguramos que a nosa audiencia non perda nin un segundo da acción dos seus equipos locais favoritos e axudamos aos clubs deportivos a xerar novos recursos económicos”, sinalan, engadindo que en datas vindeiras poranse a disposición dos usuarios emisións especiais para cubrir os momentos decisivos das xornadas, onde se definirán ascensos e descensos.
Máis datos sobre Tiivii
Este sistema de emisión de partidos funciona de forma automática e é manexado por Intelixencia Artificial. Grazas á instalación deste sistema, os clubs teñen ao seu alcance unha nova fonte de ingresos ao tempo que dispoñen dunha tecnoloxía que lles permite avanzar en logros deportivos, ao posibilitar a reprodución detallada de cada intre. En concreto, Tiivii posibilita dar unha viraxe á metodoloxía usada ata agora para achegar ao público este tipo de acontecementos, “ao complementar as actividades por medio dun sistema de retransmisión en directo de forma totalmente automatizada e sen necesidade de intervención humana a través do uso de cámaras intelixentes que producen eventos de calidade en cuestión de minutos”, explican fontes de Cinfo, engadindo que o produto inclúe soporte para medios gráficos, locucións, mestura de vídeo e mesa completa de produción na nube reforzada por Intelixencia Artificial, elementos que poderán ser usados en función das necesidades particulares de cada evento.