Cobra Kai estrea videoxogo

martes, 27 de outubro do 2020 Marcus Fernández

En 1984 o filme Karate Kid converteuse en todo un fenómeno que deu pé a unha saga que deixou unha fonda pegada na cultura popular, como demostrou hai un par de anos a serie Cobra Kai, secuela ambientada da actualidade, que estreou dúas tempadas en YouTube, aínda que o seu grande éxito chegou hai pouco, coa súa incorporación a Netflix, plataforma que estreará unha terceira tempada o vindeiro 8 de xaneiro.
Aproveitando o rexurdir do fenómeno dende GameMill tiveron a ben adaptar a serie a un videoxogo de loita homónimo, que permite tomar o control de 8 personaxes distintos (con cadanseus progresos e técnicas especiais) e conta incluso con cooperativo multixogador.
Cobra Kai conta cunha liña argumental dobre, de xeito que podemos optar por controlar a Daniel LaRusso e os seus alumnos do Miyagi-Do Karate nunha campaña histórica ou elixir a Johnny Lawrence e os seus discípulos do Cobra Kai. De completar ambas partes da campaña desbloquearase un final verdadeiro.
O xogo conta con evolución de personaxes ao estilo dos xogos de rol, conta cun sistema de cambio de personaxe (dentro do seu respectivo dojo), e conta con 28 misións cargadas de personaxes e inimigos da serie, contando incluso coas súas voces orixinais.
O novo xogo de Cobra Kai está dispoñible por 39,99 euros en versións para Xbox One, para PlayStation 4 e para Nintendo Switch en formato descargable, chegando en breve ás tendas tamén en formato físico.

Os personaxe do xogo contan con técnicas específicas
Aparte de elixir aos personaxes de Cobra Kai, tamén poderemos optar polos membros do Miyagi-Do Karate liderados por Daniel LaRusso

Tráiler do xogo

PUBLICIDADE