Código Cero cumpre 11 anos na web

Así era codigocero.com durante o seu primeiro ano na web

Durante os últimos meses estivemos a celebrar o 10º aniversario da revista Código Cero, pero tal publicación naceu inicialmente na web, concretamente un 25 de xullo, de xeito que hoxe é o día no que celebramos 11 anos informando sobre as Tecnoloxías da Información e a Comunicación en galego, feito que consideramos toda unha honra, pois ter mantido o medio activo durante tanto tempo só é posible grazas ao xeneroso apoio de empresas, asociacións, administracións e institucións, así como dos lectores, que coa súa fidelidade e confianza déronnos a forza para seguir con este proxecto que agardemos que continúe moitos anos a servir de testemuña do cada vez máis vivo sector TIC galego.
Se botamos a vista atrás podemos lembrar que este medio dixital naceu como un complemento do programa da Radio Galega Código (espazo radiofónico do que tomou o relevo o actual Banda Ancha, dirixido tamén por Xosé María Fernández Pazos) que pretendía axudar a superar o atranco de dar enderezos web a través das ondas, e que pasiño a pasiño foi evolucionando adoptando novos contidos como un boletín diario por correo electrónico (actualmente operativo) e un boletín semanal de 4 páxinas en PDF (que evolucionaría no que hoxe é a nosa edición impresa), consolidándose como un medio de referencia na nosa comunidade, tanto por informar sobre tecnoloxía como por optar polo galego como canle vehicular. Grazas a todos os que fixeron iso posible.