Colplay permite a descarga de balde dun directo na súa web

mércores, 3 de xuño do 2009 Raquel Noya

Relación de temas incluídos no álbum de balde

A banda británica Colplay, que no pasado mes de febreiro logrou o prestixioso premio Grammy á mellor canción do ano e ao mellor álbum de rock por Viva la Vida or Death and All His Friends, vén de mostrarlle o seu agradecemento aos fans e seguidores “que gastan cartos nos seus concertos” da mellor maneira que se poden agradecer este tipo de apoios: permitindo a descarga dun traballo recompilatorio de balde dende a Rede.
Trátase dun directo que eles mesmos titularon LeftRightLeftRightLeft e que se pode baixar dende a súa web oficial sen ningún tipo de requisito para facelo.
O traballo reúne varios temas do seu último álbum, tales como a galadoada Viva la vida ou a que lle dá nome ao álbum, Death and All His Friends e tamén dos seus discos anteriores, como Fix you ou Clocks.
A banda de Chris Martin, que actuará o vindeiro 4 de setembro no Estadi Olímpic Lluis Comanys de Barcelona, o único concerto que dará no noso país, xa esgotou practicamente tódalas entradas da súa xira, o que demostra, unha vez máis, que a descarga de música en liña non ten por que supoñer a ruína de ningún grupo ou artista, sobre todo se este fai uns bos directos, como é o caso.

PUBLICIDADE