ComTecArt afronta a recta final do seu traballo para converter Arnoia, Arnoia en videoxogo

Este 31 de marzo tivemos ocasión de coñecer máis detalles do proxecto para converter a novela Arnoia, Arnoia, de Xosé Luís Méndez Ferrín, en videoxogo, unha iniciativa da que falamos os días pasados en Código Cero, con motivo do seu arrinque, destacando que vén de man da residencia creativa ComTecArt (unha das seis residencias desta índole que acolle a Cidade da Cultura nesta primeira metade de ano) na que participa un grupo de 9 estudantes e persoas egresadas de diferentes perfís e titulacións da UVigo. Segundo puidemos saber, a residencia (impulsada de xeito conxunto dende a Universidade de Vigo e a Xunta) remata esta fin se mana no Gaiás logo dun mes de intenso traballo.
Tres áreas
O alumnado da UVigo, procedente de cinco titulacións diferentes e dos tres campus da universidade, desenvolve o seu traballo no Gaiás organizados en tres áreas: deseño, ilustración e arte, e programación e Intelixencia Artificial, como se fosen tres departamentos dunha produtora que deben coordinarse para desenvolver un proxecto único. Segundo destacan a UVigo e máis a Xunta (Consellería de Cultura e Educación) trátase “dunha experiencia moi inmersiva” na que, como salientan tamén os profesores responsábeis da iniciativa, “sobresae o bo ambiente de traballo xerado entre o grupo de estudantes, que non se coñecían previamente”.
Narrativa, arte e tecnoloxía en equipo
Os participantes encárganse, entre outras cuestións, de escribir o guión literario e os diálogos, deseñar a narrativa da historia e coordinar os outros departamentos. Tamén son artífices da parte estética do xogo, desde definir a paleta de cores que empregarán ata crear os bocexos das personaxes, as texturas e, en definitiva, trasladar as palabras coas que Méndez Ferrín describe o mundo máxico de Arnoia, Arnoia a un escenario de videoxogo.
O equipo tamén traballa a área de programación, a través tanto de liñas de código como formas xeométricas en movemento, dando forma a unha sorte de esqueleto sobre o que máis adiante se aplicarán os deseños e a arte do xogo. Este departamento é tamén o responsábeis de dar vida ás personaxes, así como de establecer a física dos obxectos e dos escenarios para que aquelas poidan interactuar con eles sen erros.
Logo do remate da residencia, o equipo seguirá afinando o xogo máis aló da estadía no Gaiás co obxectivo de presentar o resultado ao público da mellor forma posíbel. Á hora de valorar o seu paso pola Cidade da Cultura, os participantes coinciden en destacar “o bo ambiente”, a “enriquecedora comunicación interdisciplinar” e “o desafiante dunha experiencia” que lles achega un pouco máis as súas aspiracións de dedicarse profesionalmente ao desenvolvemento de videoxogos.