Comeza a conta atrás para a décima edición da FIRST LEGO League Galicia

xoves, 22 de febreiro do 2024 S. P.

O vindeiro 4 de marzo volve ao Campus de Ferrol a FIRST LEGO League Galicia (FLL Galicia), organizada pola Escola Politécnica de Enxeñaría de Ferrol (EPEF) e o Campus Industrial da UDC baixo o paraugas da asociación ingeniera.soy. Trátase da décima edición dunha das grandes probas galegas de talento tecnolóxico maker, amais de ser unha porta da entrada para ducias de estudantes nos ámbitos da electrónica, a robótica, a Intelixencia Artificial e a tecnoloxía igualitaria, inclusiva, sustentábel e sen cancelas.
A FIRST LEGO League Galicia terá lugar o vindeiro sábado 2 de marzo no Campus Industrial de Ferrol e, máis concretamente, na Escola Politécnica de Enxeñaría e na Facultade de Humanidades e Documentación.
O Xogo do Robot disputarase no Pavillón de Esteiro e a entrega de premios levarase a cabo no Auditorio Municipal de Ferrol.
Ao igual que en edicións anteriores, o evento conta coa colaboración da Xunta, a través da Dirección Xeral de Emprendemento e Apoio ao Emprego, da Deputación Provincial da Coruña e do Concello de Ferrol. Ademais, patrocina a FLL Galicia a empresa Gabadi SL, o Ilustre Colexio Oficial de Enxeñeiros Industriais de Galicia (ICOIIG), o Colexio Profesional de Enxeñaría Informática de Galicia (CPEIG), Gadis, ERROR! Ferrol, PuntoGal, Neodyn e Todo Ocio.
Que é a FIRST LEGO League?
A FIRST LEGO League é un programa internacional que desafía a mozos e mozas de entre 4 e 16 anos, divididos en tres categorías, a resolver problemas do mundo real como poden ser a reciclaxe, a educación ou as enerxías renovábeis. Ao mesmo tempo, aprenden valiosas habilidades para o seu futuro profesional e persoal como son o traballo en equipo, a resolución de problemas e a comunicación. Este é un desafío conformado por tres ámbitos de traballo:
• Deseñar, construír e programar un robot
• Desenvolver un proxecto de innovación que dea solución a un problema proposto por eles mesmos dentro da temática anual
• Demostrar uns valores de equipo
A FIRST LEGO League ten unha dobre misión: por unha banda fomentar as vocacións científicas e tecnolóxicas entre os máis novos; e pola outra desenvolver habilidades e competencias de futuro.
Presentación
A competición será presentada este venres 23 de febreiro na sala anexa ao Salón de Actos Concepción Arenal do Campus Industrial de Ferrol, ás 12:00 horas. O acto estará presidido pola vicerreitora do Campus de Ferrol e Responsabilidade Social, Ana Ares Pernas, a directora xeral de Emprendemento e Apoio ao Emprego, Margarita Ardao Rodríguez, a concelleira de Educación, Universidade e Política Lingüística do Concello de Ferrol, Patricia Cons Formoso, o director do Campus Industrial da Universidade da Coruña, Marcos Míguez González, o director da Escola Politécnica de Enxeñaría de Ferrol, Vicente Díaz Casás, e o coordinador da FLL Galicia, José Antonio Becerra Permuy.

PUBLICIDADE