Comeza o curso sobre gaming e emprendemento impulsado pola Cámara de Santiago e a Xunta
luns, 19 de abril do 2021
Formar
a dúas ducias de mozas e mozos da nosa terra nas posibilidades
(creativas, empresariais, laborais) do sector dos videoxogos. Este
é o gran obxectivo da iniciativa conxunta de formación que arrincou
este 19 de abril no Gaiás impulsada pola Cámara de Comercio de
Santiago, a Xunta (a través da Fundación Cidade da Cultura) e máis
a Fundación INCYDE. O curso Videoxogos e emprendemento
inclúe sete semanas de capacitación e asesoramento personalizado.
Enmárcase
no Programa de formación e asesoramento a empresas e profesionais
culturais que desde o Gaiás desenvolven a Xunta e a Cámara de
Comercio, que, ademais de asesoría personalizada inclúe accións
formativas en eidos como a internacionalización, o emprego das
Tecnoloxías da Información e a Comunicación (TIC), o financiamento
e o capital risco ou a xestión empresarial.
A
apertura do curso, que se desenvolve a través de vídeo-conferencia,
contou coa participación da xerente Cidade da Cultura, Ana Isabel
Vázquez; a secretaria xeral da Cámara, Rosa Cardeso, e o director
de proxectos da Fundación INCYDE Jorge Hierro Álvarez.
O
programa, dirixido a mozas e mozos de menos de 30 anos inscritas/os
no Sistema Nacional de Garantía Xuvenil, ofrece a oportunidade de
“formarse nun sector punteiro, o do gaming, que se atopa en
plena expansión e que vén experimentando crecementos acumulados nos
últimos anos”, informaron as entidades responsábeis da súa posta
en marcha, engadindo que a actividade está destinada tanto a persoas
emprendedoras ou profesionais que queiran iniciarse no
desenvolvemento de videoxogos ou ampliar e consolidar os seus
coñecementos no campo da creatividade dixital, como a aquelas que
simplemente teñan interese no desenvolvemento de videoxogos de forma
profesional.
Os
participantes no curso aprenderán o funcionamento das empresas do
sector, coñecendo os roles do equipo técnico, as tecnoloxías
empregadas e as ferramentas, estratexias e canles axeitadas para
expor unha idea de negocio e poñela en marcha.