Comezou XGN R Encounter 2019 con máis actividades e un 12% máis de participación
venres, 11 de outubro do 2019
A
party informática
XGN R Encounter pon en marcha hoxe a súa décimo novena edición,
e faio batendo récords en cifra de persoas inscritas, en
conectividade e en número e calidade das súas propostas. A Feira
Internacional de Galicia Abanca, que conta de novo nesta cita co
respaldo da Consellería de Política Social e (por terceiro ano
consecutivo) coa colaboración e patrocinio da empresa R, está a
reunir preto dun milleiro de seareiras e seareiros das novas
tecnoloxías, fronte aos 900 da edición anterior. Isto no que se
refire aos inscritos para a zona Intranet. O incremento é dun 12%.
Aprendizaxe,
intercambio de experiencias e diversión serán os eixos dunha cita á
que acoden tanto afeccionados como profesionais da informática, o
lecer electrónico e as novas tecnoloxías de 23 provincias, o que
reflicte, segundo as entidades organizadoras, o crecemento da party
e o seu coñecemento fóra de Galicia. Achegaráselles navegación
grazas a R a unha velocidade de 20 Gbps, unha cifra que duplica a da
pasada convocatoria.
O
evento tamén volverá contar cun gran recanto Extranet, unha zona
cun completo programa ao que poderán acceder de balde as persoas
rexistradas pero tamén as visitantes en xeral que se acheguen ao
recinto de Silleda.
A
cita conta con numerosas actividades dirixidas exclusivamente aos
rexistrados, como concursos de arte dixital nas súas tres vertentes,
creación de imaxes dixitais, música dixital e programación.
Ademais, o hardware contará con numerosas actividades, entre elas
modificación e personalización de equipos, granxas de
impresoras 3D e zonas de realidade virtual orientadas unicamente a
estes participantes. Sumaranse os torneos de videoxogos, que nesta
ocasión aumentan un 25% os seus títulos e inclúen estilos para
todos os gustos.
Por
outra banda, tanto para os inscritos como para os visitantes á
Extranet haberá moitas outras actividades. Destacará a proposta de
realidade mixta, que combina a realidade virtual cun escenario con
partes reais, e que supón “unha inmersión total”, sinalan as
entidades impulsoras do evento, engadindo que “nesta edición
aumentáronse espazo e salas, e nelas poderán vivirse experiencias
como camiñar por enriba de edificios nunha gran cidade, mergullarse
baixo o mar ou voar sobre un dragón”.
Sumaranse
a elas distintas conferencias sobre a actualidade das novas
tecnoloxías, como Claves para que o teu negocio triunfe na
internet, Seguridade e privacidade na rede, Mamá,
mamá, quero ser hacker, Desenvolvemento de software no século
XXI: converte a túa paixón na túa profesión, Introdución
ao hacking de videoxogos e Ivao, presente e futuro. Tamén
haberá obradoiros, como por exemplo o de Crea R de robótica, onde
os nenos poderán iniciarse na montaxe destes enxeños electrónicos
nunha iniciativa enmarcada no programa Digitalent da AMTEGA, e os de
chovafoam, material para o vestiario de cosplay
(actividade consistente en usar disfraces e accesorios para
representar unha personaxe de videoxogo, cinema, manga ou cómic). R
tamén pon en marcha este ano unha xornada dedicada ás empresas, na
que un experto en redes sociais ofrecerá pautas e consellos ás PEME
para comunicar ben na Internet e un emprendedor socio tecnolóxico de
R exporá como sacou adiante a súa aventura empresarial.
As
propostas continuarán con xogos de mesa, xadrez, billar, pistas
deportivas, zona de consolas, campionato de karting, partidos
de fútbol burbulla, un rocódromo, unha exposición de figuras de
ciencia ficción, un concurso de cosplay ou zonas de rol, nerf
e wargame.
En
total serán máis de 70 as actividades dun programa que medra
respecto á pasada edición co obxectivo de que a XGN R Encounter
“siga gañando en atractivo tanto para os rexistrados como para os
visitantes”.
O vicepresidente da Xunta, Alfonso Rueda; a directora xeral de Xuventude, Participación e Voluntariado, Cristina Pichel; o director xeral da Fundación Semana Verde de Galicia, Ricardo Durán; a directora da Axencia para a Modernización Tecnolóxica de Galicia (AMTEGA), Mar Pereira; ademais do conselleiro delegado do Grupo Euskaltel, José Miguel García; o xerente da Fundación Euskaltel, Sabino San Vicente; e o director de Empresas R e Grupo Euskaltel, Isidro Fernández de la Calle; inauguraron esta mañá o encontro.